Pandemia

KRALENDIJK – Henter komunidat a sufri bou di e pandemia Covid-19. Gezaghèber i su ekipo médiko a hasi esfuerso máksimo pa kontené e plamamentu di e virus aki bou di nos hendenan. Pa fortifiká nos resistensia nos por a disponé BOLUNATARIAMENTE pa bakuná dos biaha. Medidanan ku a mishi ku nos libertatnan konstitushonal, manera entre otro di move liber, ets, ets. Na e otro un banda ki ora ku a presentá e oportunidat e ekipo di rekuperashon ekonómiko a habri nos aktividatnan ekonómiko mas tantu ku responsabelmente tabata posibel.

I aki importante a bira KOMPORTASHON di kada un di nos. Por lo general e gran mayoria di nos hendenan a sigui e instrukshonnan, ounke ela eksigí sakrifisio di nos tur. Speshalmente e mundo komersial a risibí un gòlpi duru. USIBO ta di opinion ku e tres puntonan ku a pidi komunidat, esta MANTENE DISTANSIA, LABA MAN i no BÒNCHA RIBA OTRO, no tabata algu eksagerá ni di mas pidí. E tabata i ta ketu bai inspirá pa e pensamentu SI BO KUIDDA BO MES, BO TA KUIDA OTRO. Pa esnan di ideologia cristian e no ta nada otro sino STIMA BO PROHIMO MESKOS KU BO TA STIMA BO MES. Nos tabata i ta den un situashon ku ta nos tur mester perkurá pa nos mes i ku esei perkurá pa nos próhimo. Djabièrnè último a suavisá e medidanan pisá ku pa simannan largu tabata na vigor. Nos ta bolbe haña un oportunidat pa demonstrá nos KOMPORTASHON den públiko. Ta kompletamente na nos ku nos komunidat ta keda habrí pa nos gosa di nos libertatnan den un forma nobo di tene distansia, laba man i no bòncha riba otro òf ku nos ta bai bèk den isolashon den nos kas i kurá di kas ku tur su konsekuensianan.

Akuerdo di Kralendijk

Despues ku dia 16 di aprel partidonan den Diálogo Sentral a yega na un akuerdo unánimame pa loke ta trata oumento di sueldo minimo i un minmo

sosial, e akuerdo aki a keda bon risibí tantu aki na Boneiru komo na Den Haag. E ta en berdat un dokumento úniko i históriko, pasobra ta un di e poko si no ta e úniko posishon di Boneiru kargá  pa representantenan di tur sektor di nos komunidat. Ta na Ulanda awor pa den dialogo ku Boneiru brasa e dokumentu trahá pa Boneiru, dor di Boneiru i yega na akuerdo di implementashon. No por warda mas. Nos pueblo tin mas ku 10 aña ta sufriendo di pobresa(40% di nos poblashon). Trabou mester paga, pues trahadónan tambe tin años ta warda riba un oumento di e sueldo minimo. Nos ekonomia ta stanká parsialmente pasobra e forsa di kompra di un gran parti di nos habitantenan ta hopi suak. Nos mester sigui lucha pa eliminá e asuntu di banko di kuminda. Tur hende tin e derecho riba un trabou ku ta paga un sueldo hustu ku e por kria su mes i su famia i tur ku di un òf otro forma no por ta den e proseso laboral mester risibi un ayudo finaniero ku ta garantisá ku e por biba den un forma desente i kubri su gastunan minimal di tur luna. Un pabien na tur e partidonan den Dialogo Sentral ta mas ku na su lugá. Boso ta biba i traha mei mei di e komunidat aki i boso a mustra madures pa salta boso propio sombra i traha un brùg entre boso tur ku un meta esta pa liberá e komunidat boneriano for di e prison di pobresa ku ya pa años e tabata aden. Danki i pabien.

Retiro di sekretario

Entrante 1 di mei sr. Norwin ”Nochi” Willem lo baha komo sekretario di USIBO despues di a fungi pa 4 aña den e funshon aki. Ku e retiro aki ta habri kaminda pa sanger nobo drenta e organisashon i yuda karga responsabilidat pa mantené e bos di e trahadó bibu den e desaroyo sosial ekonómiko di nos isla. Ku su retiro komo sekretario no ta nifiká ku Nòchi lo bira lomba pa sindikalismo. E lo bai fungi huntu ku e dos eks-presidentenan, esta Charly Anthon i Charly Mercelina den e kuerpo di Konseho di USIBO for di kua e lo por keda duna su aporte na bienestar di e organisashon madre di sindikalismo aki na Boneiru. USIBO ta deseá e sekretario(a) entrante tur klase di éksito i nos tin sigur ku esun nobo sigur den kuminsamentu lo por konta ku apoyo, konosementu i eksperensha di Nòchi.

Share This
error: Content is protected !!