Dia di labor ta pa rekordá tur hende ki importante ta pa por tin un trabou, pero tambe pa kòrda tur hende ku sindikalismo tin un kaminda largu pa kana ainda, nos falta hopi pa yega.

Tin diferente área laboral ku ainda no ta uni den un sindikato, sufriendo bou di e kondishon nan laboral ménos faborabel, strobando nan di por biba un bida digno na Boneiru C.N.

Mester krea mas poder laboral, ku esaki mi ke men, mester pensa, papia i hasi, no keda na papia so sin hasi. Miembronan mester tuma mas embolbimentu den nan sindikato.

Eksihí mas komo miembro, puntra mas, i partisipá mas den evenementu nan organisá pa bo sindikato.

Nos komo defensornan di trahadónan ta esnan promé yama pa sòru ku den e periodonan ku ta konsentrá riba e tema di labor na radio, televishon, korant, media nan sosial, tur haña sufisiente tópikonan di interes laboral, pa e pueblo ta bon informá. Nos komo lider sindikal mester por trese informashon pa e pueblo i e miembronan.

Koleganan sindikal i miembronan, nos mester uni i traha e moketa di union pa nos por hiba e lucha laboral, abo komo sindikalista ta e abogado di e trahadó.

Sindikalismo tei pa salbaguardiá derechinan i debernan laboral, pero e tin ku avansá, ekspandé i uza e poder di su “netwerk” pa engrandese derechinan di trahadónan i empoderá esakinan den tur área. Mester pensa i hasi mas ku solamente e parti laboral, mester hisa e nivel di konosementu, dor di duna, kurso i workshopnan pa e miembronan i asina traha riba miembronan, ku ke bira miembro di direktiva di un sindikato.

Share This
error: Content is protected !!