KRALENDIJK — Segun informashonnan ku nos a risibí muy probabel Prince Royce lo bai ta na Boneiru fin di luna aki. Esaki debí ku nos orguyo nashonal Ir-Sais a graba un kantika kuné. Si tur kos kana segun plan i si korona vírus pèrmití, esaki lo bai sosodé fin di mei. Ir-Sais su karera artístiko ya kaba ta unu global i internashonal, mirando tur e artista nan ku e la graba kuné i tambe su kantidat di views nan riba e diferente plataformanan disponibel. Esaki atrobe ta un gran gesto di parti Ir-sais i su tim pa Boneiru. Ku e videoclip aki Ir-sais lo sigui promové su dushi Boneiru, i ban spera ku gobièrnu di Boneiru dun’é e balor ku e meresé di bèrdat, mirando kuantu kos Ir-Sais a nifiká i ta nifikando pa Boneiru. Den 2021 tin algun nòmber nan grandi ku Ir-sais a graba kuné kaba di kual ta Sean Paul, Davido, Choquibtown, Afro B i awor pendiente pa e videoclip ku Prince Royce kual ta un artista sumamente konosí pa su kansionnan di bachata. Nos a komprondé tambe ku Ir-sais tin un kantika kla i graba kaba un artista latino sumamente grandi, un di esun nan mas grandi den e género di reggeaton den e último añanan tras di lomba. Nòmber di e artista aki nos no por divulgá ainda.
Nos tin ku gradisí Ir-sais pa tur loke e ta hasiendo pa Boneiru i nos lenga papiamentu i hopi exito pa kontinuá ku su karera artístiko internashonal.
FUENTE: LIVE 99 FM

Share This
error: Content is protected !!