Kralendijk, 12 di mei 2021 –Riba promé di mei, Wardadó di Playanan boluntario di Sea Turtle Conservation Bonaire (STCB) tene e promé patruyanan di monitoreo di nèshi di turtuga pa 2021 na Klein Bonaire, Te Amo & Donkey Beach i na e playanan na e parti sùit di Boneiru. Patruyanan na Playa Chikitu, den Parke Washington Slagbaai, lo sigui den luna di yüni, ora ku ta spera yegada di e promé turtuga blankunan muhé pa bin pone traha nèshi.

STCB su Kordinadó riba Tereno Daan Zeegers i Wardadó di Playa Sue O’Brien a registrá e promé nèshi di turtuga di e aña akí riba 10 di mei na Klein Bonaire, ku ta e mayor sitio di traha nèshi. E nèshi akí tabata di un turtuga kawama, un di espesienan di turtuga ku normalmente ta traha nèshi na Klein Bonaire entre mei ku ougùstùs. Ta spera yegada di e promé turtuga karètnan ku turtuga blankunan na luna di yüni.

Sin e sosten di su Wardadó di Playanan, STCB lo no por a patruyá tur e sitionan di traha nèshi kada dia di siman. Daan Zeegers ta komentá: “Nos ta sumamente gradesido pa e sosten di nos boluntarionan! Dor di nan sosten, nos por registrá tur aktividat di traha nèshi i kolektá datonan importante riba kua ta basa akshonnan di maneho pa protehá turtuganan di laman di Boneiru. Nos Wardadó di Playanan no ta sostené solamente nos trabou ku kontròl di e playanan, nan ta yuda nos tambe ku registrashon di nèshi nobo i ekskavashon di nèshinan ku a kaba brui, i piki sushi ku por forma un opstákulo pa turtuga muhé ku ta traha nèshi i yunan resien nasé, hasiendo asina e playanan bunita pa turtuga i pa hende.”

Si bo ke bira boluntario pa STCB òf bo ke djòin nan riba un patruya di monitoreo na  Klein Bonaire, bo por manda un imeil pa Daan na field@bonaireturtles.org. Si bo ke sostené e trabou di STCB na un otro forma, bo por adoptá tambe simbólikamente un yu resien nasé òf adoptá hinter un nèshi di turtuga. Pa mas informashon, por fabor tuma kontakto ku STCB na stcb@bonaireturtles.org.

STCB ta hopi agradesido pa e sosten ku a kontinuá di parti di kompanianan i famianan pa medio di nan programa di Adoptá-un-Nèshi. Nos organisashon ke gradisí e adoptantenan di 2021: Best Cellars, VIP Diving, QVillas, BUTS Technical Consultancy, Dive Friends Bonaire, Bruce & Donna Hood, Novis Family, Gaia Concepts, Cargill, Blue Jay Holding, Harbour Village, The Laughing Seahorse, Enjoy2Stay, dNM Interim, Sand Dollar, Nederlands-Belgische Schildpaddenvereniging and anonymous donors. Masha danki!!

Share This
error: Content is protected !!