KRAELNDIJK – Dia 16 di aprel Diálogo Sentral den kua Kolegio Ehekutivo a presentá e asina yamá “Akkoord van Kralendijk” i ku diputado den Heijer den su bishita na Den Haag a interkambiá ku e minister demisionario di asuntunan sosial i di labor Sr. Koolmees. Den un komunikado a sali ku diputado Den Heijer ta yegando na un solushon pa oumento di suèldu mínimo. Dos anunsio ku a trese speransa i alegria den nos komunidat, spesialmente serka e klase trahadó ku pa años ta en espera pa un oumento hustu di su suèldu pa asina e por kumpli ku su obligashonnan mensual, deskribí den e rapòrt Regioplan komo “bestaansminimum”. Alegria i speransa tambe serka esnan mas vulnerabel den nos komunidat, esta e penshonadonan ku solamente tin ku biba riba nan penshun di behes i pa esnan ku tin ku kobra ònderstant. Alegria i speransa ya ku oumento di suèldu mínimo lo trese kuné oumento den nan “ uitkeringennan”.
Tur e ehersisionan aki tin komo meta pa oumentá e forsa di kompra den nos komunidat i kuné trese kresementu ekonómiko. Un kondishon sinembargo tabata mará na e ehersisionan aki, esta ku miéntras ta oumentá entrada, gobièrnunan(OLB i Den Haag) mester hasi esfuerso pa baha gastunan o a lo ménos manehá e gastunan pa evitá ku ta duna ku man drechi i ta kita ku man robes.
Desagradablemente, mi mester tuma nota ku den un siman di tempu komunidat a keda konfrontá ku dos subida supstansial ku lo bai afektá negativamente tur e esfuersonan menshoná. Nan ta oumento di kombustibel i e anunsio di oumento di hür di kasnan di Fundashon Cas Boneriano. E oumento di kombustibel lo tin un efekto “spin-off” ku lo no keda solamente na e oumento di kombustibel pero ku lo pusha tur preis den produkto i servisio den nos komunidat manda ariba, miéntras ku e oumento di hür lo afektá e grupo vulnerabel ku ta hür kas serka FCB. Ya doñonan di pòmp a manda un karta pa Konseho Insular den kua nan a kritiká ku a oumentá e preis di kombustibel kontra tur palabrashon ku tabata eksistí entre Kolegio Ehekutivo i nan i ku nan ta mustra ku ta bira difísil pa nan keda entregá kombustibel bou di e sirkunstansianan aki.
Mi ta di opinion ku un ahuste di e rapòrt di Regioplan sin duda lo indiká ku e sifra ku a usa pa indiká e “bestaansminimum“ lo oumentá supstansial. Pa tal rason, mi ke hasi uso di nos Reglamentu di Òrdu, artíkulo 45, pa hasi e siguiente preguntanan:
1. Kiko ta Kolegio Ehekutivo su opinion pa loke ta trata e oumentonan menshoná relatá na oumento di kosto di bida i oumento di “cost of doing business” ku tur su konsekuensianan pa nos ekonomia i nos bida sosial?
2. Kiko ta pensamentunan di Kolegio Ehekutivo pa loke ta trata tur e oumentonan aki relatá na e situashon di pobresa riba nos isla?
3. E oumento aki ta kontra-produktivo pa loke ta e esfuersonan ku a kaba di hasi i pone den e “ Akkoord van Kralendijk”. Kiko ta Kolegio Ehekutivo su pensamentunan i kon ta bai atendé ku e parti aki?
4. Ki maneho general Kolegio Ehekutivo ta hibando o lo bai hiba pa kontrarestá e oumento di kosto di bida aki mas e oumento di “cost of doing buisines”?
5. Ki maneho Kolegio Ehekutivo den konsulta ku Den Haag lo bai hiba pa krea un reda sosial pa esnan vulnerabel den nos komunidat?
6. Kolegio Ehekutivo por duna un splikashon detayá ku lo hasi uso di su outoridat i proklamá un maneho di preis pa e makutu básiko i lo konsiderá pa amplia e makutu aki, sigur ku komestibel saludabel? Lo insentivá e kòntròl basá riba un esfuerso kombiná entre Direktorado di Mantenshon i Supervishon i Fundashon Tienda pa Konsumidó?
7. Kon Kolegio Ehekutivo lo bai hasi -huntu ku Den Haag- pa reaktivá e proyekto di komparashon di preis?
Mi ta konta di risibí kontestanan oral, al kaso den e próksimo reunion públiko di Konseho Insular
Atentamente,
Share This
error: Content is protected !!