KRALENDIJK – Rítmiko Timon Krioyo a nase 10 di aprel 2018. For di e dia aki, nan a bin ta duna vários presentashon rònt Boneiru i tambe a partisipá un bia na Kanto Krioyo. Durante e añanan Rítmiko Timon Krioyo a sigui desaroyá i evolushoná musikalmente riba e tereno kultural. Pa e motibu aki, direktiva huntu ku sobra miembro di Rítmiko Timon Krioyo a yega na e desishon pa kambia e nòmber, ya asina e ta kuadra mas ku e direkshon ku e grupo ta bai awor aki. E nòmber nobo di Rítmiko Timon Krioyo a bira Rítmiko Timon. Despues di diálogo entre e miembronan di e grupo, a yega na un komprondementu i Jonathan Dewind ke a mantené Timon den e nòmber. Huntu ku e kambio di nòmber, a adaptá e logo tambe. Esaki a bira mas moderno i tur miembro por identifiká nan mes ku n’e. Rítmiko Timon: “Ora bo ke desaroyá musikalmente, bo ta krea diferente kos i ta importante pa bo por identifiká bo mes ku esaki. Esei ta nifiká ku na momentu ku ta hasi músika krioyo tambe, praktikamente nos mester kue loke tin kaba, respetando e personanan ku a traha riba dje den pasado, i krea nos mes ritmo. Loke tin kaba, nos ta bolbe rekreá den un otro estilo i traha nos mes ritmo. Esaki ta tumando lugá kaba den piesanan ku ta den studio.” Keda pendiente pa e siguiente moveshonnan di Rítmiko Timon. Tin mas kosnan na kaminda!
Share This
error: Content is protected !!