TA PREPARÁ POR SALBA BIDA.
Tur aña Servisio Meteorológiko Kòrsou ta para ketu na komienso di un temporada di orkan pa nos region, pa informá i konsientisá públiko relashoná ku e impaktonan di orkan. E temporada di orkan ta kuminsá 1mé di yüni i lo terminá 30 di novèmber. Den e lunanan aki por spera formashon di siklon tropikal riba region di Osean Atlántiko, Laman Karibe i Golfo di México. Naturalmente, mirando ku ta fenómenonan di naturalesa, e sistemanan aki tambe por generá sea promé òf despues di e lunanan menshoná. E aña aki ya kaba den luna di mei a desaroyá un tormenta tropikal, Ana, serka di e isla di Bermuda.
Den e temporada aki, ku un laman ku lo ta relativamente kalor den Osean Atlántiko, Laman Karibe òf den Golfo di México, si un ola tropikal òf un otro disturbio den atmósfera sigui desaroyá, un depreshon tropikal por wòrdu generá i lo risibí un number. Segun e sistema aki sigui desaroyá, e bientunan lo bira mas fuerte (mas ku 34 nudo) i e lo wòrdu klasifiká komo un tormenta tropikal i lo risibí un nòmber. Ora e tormenta tropikal su forsa di bientu sigui oumentá (mas ku 64 nudo) e lo wòrdu kategorisá komo un orkan.
E tres efektonan di un siklon tropikal ta bientu duru durante di vários ora, áwaseru torensial i laman hopi brutu. (1) Bientu duru por ranka dak di kas, basha palu abou, ophetonan por wòrdu lansá i bentá riba kas i outonan. (2) Áwaseru torensial por kousa inundashon ku ta pone ku kasnan i kamindanan por inundá. (3) Laman brutu por kibra pirnan i botonan ku ta mará, pero tambe laman por subi tera i kousa inundashon na hotèlnan òf kasnan pegá ku kosta. Ta bon pa indiká ku no nesesariamente tur tres efekto lo afektá nos isla na mes momentu. Tormenta Tropikal Joan (1988) su efektonan prinsipal tabata bientu fuerte, Orkan Lenny (1999), Tormenta Tropikal Omar (2008) i Orkan Matthew (2016) a impaktá Kòrsou ku laman brutu, Orkan Ivan (2004) i Tormenta Tropikal Tomás (2010) ku áwaseru torensial na respektivamente Aruba i Kòrsou.
E aña aki Servisio Meteorológiko ke enfoká riba e tema di preparashon trempan ku lo fasilitá e akshon ku tur hende tuma den kaso di un menasa. Esakinan ta algun punto di preparashon:
Medida preventivo pa ku bientu:
Sea konsiente di e kondishon di bo kas; inspektá bo dak i, si ta nesesario, refors’é; kòrta brasa di palu i mata pegá ku dak, rònt di kas i limpia bo kurá, ya ku ophetonan lòs por kousa daño na bo kas òf esun di bo bisiñanan.
Áwaseru:
Sea konsiente di e lokalidat di bo kas i chèk si esaki ta den un área ku sa inundá dor di áwaseru fuerte òf laman haltu; limpia kurá pa e awa di áwaseru kore bai den un forma natural i sali for di bo kurá. Pone santu kla i prepará pa yena esaki na saku pa prevení awa drenta kas; si riba kaminda bo topa ku un área ku ta inundá, bira bèk i no pasa dor di esaki, ya ku bo por hoga. Buska un saku di plèstik pa warda tur bo dokumentonan importante aden,pa nan no daña dor di awa.
Laman:
Sea konsiente di e lokalidat di bo kas i si esaki ta den un área ku sa inundá dor di laman haltu i/òf brutu. No subi laman, si a deskonsehá esaki!
Ademas yuda bo bisiñanan, espesialmente esnan di edat avansá, ku nan preparashon.
Sòru pa bo tin un plan di akshon pa famia, pa den kaso di un menasa bo por tuma e medidanan di protekshon nesesario;
Durante di e evento, sigui skucha radio i televishon, pa asina por sigui e boletinnan emití dor di outoridatnan.
Servisio Meteorológiko, komo e outoridat pa dil ku menasa di sistemanan di naturalesa, ta monitoreá wer den nos region i ta saka atvertensia ora ku esaki bira nesesario, pa informá i konsehá outoridatnan i tim di kalamidat di e pasonan ku pais lo mester tuma.
Por sigui nos boletinnan a traves di nos website (http://www.meteo.cw), nos página di Facebook (http://www.facebook.com/Meteorological.Department.Curacao/.), nos app Curacao Weather i tambe via di WhatsApp (+5999-560-1089).
Share This
error: Content is protected !!