KORSOU.
OTRO EKSITOSO KONFERENSIA DI LIDERAZGO FEMENINO.
WILLEMSTAD – ‘Yuda muchanan muhé ku konosementu básiko di higiena, usa bo man simbólikamente komo un hèrmènt poderoso i ta e promé hende muhé ku ta haña mas voto den historia’: esakinan tabata algun di e informashonnan kompartí dor di e tremendo oradónan prinsipal kendenan a habri e virtual di 18 konferensia anual di liderazgo femenino na Kòrsou ku a hiba e titulo: ‘Lidernan femenino liderando ku ehèmpel’, djasabra i djadumingu último.
Oradónan prinsipal Sharon Katushabe na Uganda, Dr. Birgitte Tan na California, i Nina den Heyer na Bonaire a kapta atenshon di partisipantenan, kada unu ku presentashonnan fuerte.
E konferensia a start djasabra ku palabranan di habridó di konferensia Victoria Wild, sigui pa animadó di dia Jojo- J’Anmetra Waddell, invokashon di Rev. Louise de Bode i e tres oradónan prinsipal.
Despues tabatin splikashon i demostrashon tokante kon ‘shape’ bo figura dor di Sudri-Anne Elizabeth i un presentashon di Feng Shui Master Reyna Joe ku tep di kon usa Feng Shui pa avansá den un karera.
Riba e di dos dia tabatin un presentashon profundo di Dr. Lex Smith Washington di Universidat di Oklahoma ku a trata kon hende muhé eduká den posishonnan haltu por defendé i protehá nan mes kontra di hostigamentu seksual den nan karera i asina ei protehá tur esfuerso ku nan a hasi pa studia i hasi un karera.
Tabatin hopi reakshon riba e parti aki di e konferensia i a bini hopi pregunta di partisipantenan.
E aña aki tabata pa di dos biaha ku e konferensia aki mester a bai virtual debí na e reto mundial di Covid.
Esaki a hasi posibel ku hende di rònt mundu por a partisipá ya ku Zoom perfektamente a kuri ku tur frontera.
Inisiadó i organisadó di e konferensianan anual di liderazgo femenino for di 2004, Reyna Joe a ekspresá su gratitut pa tur ku a hasi posibel ku e eksperensia anual empoderante aki por kontinuá pasobra e ta benefisiá sigur sigur kada partisipante. Un danki espesial ta bai atrobe na Jason Rafaël kende pa di 18 biaha a yuda realisá e konferensia.
Ta pone mas informashon di e konferensia riba e página di Facebook: About Female Leadership.
E di 19 Konferensia anual di liderazgo femenino ta tuma lugá na mei 2022. Pa mas informashon por komuniká via di aboutfemaleleadership@gmail.com
Riba e potrèt por mira un momentu durante di e di 18 konferensia anual di liderazgo femenino na Kòrsou.
Share This
error: Content is protected !!