A DETENÉ HÒMBER DURANTE DI ENTRADA HUDISIAL
Den oranan trempan di mainta riba djabièrnè 4 di yüni a tene un entrada hudisial den un kas situá na Amboina. Aki a detené un hòmber di inisial J.G.S. di 26 aña en konekshon ku menasa i destrukshon. E entrada hudisial tabata den kuadro di un kaso di destrukshon i diferente kaso di menasa ku arma.
AINDA BASTA PROSÈSFERBAL PA MANEHÁ SIN FAHA DI SEGURIDAT BISTI
Durante un kòntròl di tráfiko na Kaya Korona riba djaweps 3 di yüni, a kontrolá 18 vehíkulo durante kua tres shofùr a risibí un prosèsferbal. Dos shofùr a haña prosèsferbal komo ku nan no por a mustra dokumentunan di seguro bálido i un shofùr a haña prosèsferbal komo ku e no por a mustra un reibeweis bálido.
Den e dianan tras di lomba a duna but tambe pa manehá sin dokumentunan bálido di seguro, sin reibeweis bálido, pa tene telefòn den man miéntras ta manehá i pa manehá sin faha di seguridat bisti. Prinsipalmente pa e último dos violashonnan menshoná ta duna mas i mas prosèsferbal.
Faha di seguridat
Bisti bo faha pa bo mes seguridat. Un faha di seguridat ta protehá okupante di un outo durante di un aksidente. Dor di uza e faha e persona protehá ta keda sinta riba su stul, no tin e posibilidat pa dal su kabes den winshil i no ta keda bentá den e outo p’aki p’aya. Dor di bisti bo faha di seguridat bo chèns di tin un aksidente mortal ta baha ku 30 pa 40%. Tambe patras den outo bo tin 20% ménos chèns di keda herida seriamente ora bo tin bo faha bistí.
Telefòn selular
Uzando bo telefòn selular miéntras bo ta manehá, bo ta hinka bo mes, pero tambe otronan den peliger. Pasobra ora nos ta uza nos telefòn nos ta ménos alertá.
Pone bo telefòn for di bista. Asina bo ta prevení e tentashon pa wak tòg. Ora bo ta partisipá den tráfiko, sea ta ku outo òf riba baiskel, ta importante pa bo ta konsientemente presente. Si bo tin un persona ku ta ferwagt un mensahe òf yamada di bo, mèldu nan promé ku por ehèmpel bo subi outo, ku bo no ta bai ta alkansabel pa un ratu.
Dokumentunan na òrdu
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
A DETENÉ HÒMBER PA MALTRATO
Riba djárason 2 di yüni a detené un hòmber di inisial D.D.D. di 39 aña di edat pa maltrato. Ela maltratá dos persona.
KIEBRO DEN KAS
Entre djamars promé di yüni i djárason 2 di yüni, deskonosínan a bai ku un suma na sèn kèsh for di un kas situá na Kaya Aruaco. Ta investigando e kaso.
Share This
error: Content is protected !!