Reina ta otorgá e premionan di Oranje Fonds na proyektonan pa personanan síkiko vulnerabel.
Expertise Center Education Care Saba ta un di e ganadónan di Appeltjes van Oranje 2021.
Durante entrega di e premionan di Oranje Fonds na Palasio Noordeinde Hulanda a anunsiá e ganadónan. Ixta Noa di Arnhem i Zelfregiecentra van Vriendendiensten di Deventer tambe a kai den premio. E ganadónan, di kua tur ta dediká nan mes na personanan síkiko vulnerabel, a risibí nan premio for di man di Reina Máxima.
Tur aña Oranje Fonds ta otorgá Appeltjes van Oranje na proyektonan sosial ku ta sòru pa ningun hende den nos komunidat mester ta nan so. E tema di e aña aki ta Poder Mental. Esei ta nifiká ku e premionan di e aña aki ta bai pa proyektonan ku ta sòru, ku sosten di boluntarionan, pa personanan ku problemanan síkiko por tin partisipashon kompletu den komunidat. A nominá 12 proyekto entre nan Stichting Equine Curaçao. Di tur proyekto tabatin un representante den e sala. Pa motibu di e medidanan relashoná ku Corona un kantidat limitá di persona tabata presente durante entrega di e premionan. Pa e motibu aki por a sigui e evento via un Livestream. Ta ripití esaki riba oranjefonds.nl.
GANADÓNAN
E proyekto Ways of Wellbeing di Expertise Center Education Care Saba ta duna sosten na muchanan ku un limitashon i nan mayornan. E último añanan aki e muchanan tabata tiné hopi mas difísil pa motibu di orkan Irma ku a asotá e isla na 2017 i e krísis di Corona ku a separá e isla kompletamente for di mundu.
Ixta Noa a gana e Grote Appeltje van Oranje. E premio aki ta bai na e proyekto menshoná pa e forma spesial ku e organisashon ta sigui desaroyá i renobá su mes. Serka Ixta Noa ekspertonan ku hopi eksperensia ta duna sosten na personanan ku tin keho síkiko. Zelfregiecentra di Vriendendiensten ta sòru pa personanan ku problema mental por partisipá atrobe den komunidat. Ta organisá un kantidat di aktividat na kua un hende por drenta den kontakto ku otronan, manera nan kompañeronan den mesun situashon.
ORANJE FONDS
Oranje Fonds ta konstruí un sosiedat sosial den kua personanan tei pa otro i tur hende por partisipá. Pa e motibu aki ta mobilisá, reforsá i sostené mas tantu hende i organisashon posibel ku ta sòru pa ningun hende ta nan so. E sosten ta konsistí di konosementu i nètwèrk, sèn, tempu i rekonosementu. E Fondo por hasi esaki danki na e.o. Nationale Postcode Loterij, Nederlandse Loterij, Amigu i kompanianan. Rei Willem-Alexander i Reina Máxima ta e pareha patrosinadó di Oranje Fonds.
Share This
error: Content is protected !!