NO TIN OBLIGASHON DI HASI TÈST PA HENDE KU TA KOMPLETAMENTE BAKUNÁ ORA DI BIAHA ENTRE E ISLANAN ABC

KRALENDIJK – Habitantenan di e islanan ABC ku ta kompletamente bakuná no tin mester dihasi un tèst di PCR na salida òf ora di biaha bèk entre e islanan, si nan mustra un prueba di bakunashon bálido. Esaki ta posibel for di 7 di yüni 2021. E biaheronan aki te ainda mester yena un deklarashon di salú sí, promé ku nan salida i biahe di regreso. No ta aseptá kopia di e prueba di bakunashon òf un ku a hasi chikitu. E prueba original tin mag di ta plastifiká sí. Ora di biaha entre e islanan, habitantenan di Aruba por mustra e prueba di bakunashon den e health app tambe. E prueba ta indiká kua bakuna un hende a haña i ki dia. Na Aruba hendenan a pasa angua ku e bakuna di Pfizer òf di Janssen. Boneiru a usa solamente e bakuna di Pfizer. Na Kòrsou hendenan a haña e bakuna di Pfizer òf di Moderna. Un hende ku haña e bakuna di Pfizer òf di Moderna, ta pasa angua dos biaha. Den kaso di Janssen un hende ta pasa angua un biaha so. Ta menshoná e fecha ku un hende a pasa e angua òf e anguanan i tambe e number di batch. Un persona ta kompletamente bakuná ora el a pasa dos angua ku minimalmente 21 dia entre e anguanan ora ta trata di Pfizer I minimalmente 28 dia ora ta trata di Moderna. Tambe mester a pasa e último angua minimalmente 14 dia pasá. Un persona ku tabatin corona, ta kompletamente bakuná ora e pasa 1 angua. Esaki nan ta yama un ‘booster bakunashon’. E persona aki mester mustra tambe un prueba di infekshon I un resultado di tèst ora di biaha.

Share This
error: Content is protected !!