E TA ANSIOSO PA TENDE RESULTADO DI E BIAHE AKI.

Komo un pagadó di belasten, mi a sinti e nesesidat pa trese mi opinion publikamente dilanti relashoná ku e delegashon ku ta na Ulanda e próksimo dianan. E komunikado por ta masha kòrtiku mes. Falta di rèspèt total pa e votadó en partikular i pa pueblo en general di Boneiru, pagadó di belasten meskors ku ami. Lo bo puntra bo mes DIKON? Wèl un pueblo ta duna konfiansa na 9 representante pa atendé ku su nesesidatnan básiko di tur dia, ku ta un dak riba su kabes, trabou pa pone pan riba mesa pa su famia, un bon infrastruktura pa brinda un bon servisio, mantenshon kontinuo di e infrastruktura aki pa e por sirbi e komunidat, fasilidatnan pa e por rekreá den su oranan liber i provishonnan adekuá pa esnan vulnerabel den nos komunidat,kualnan ta esnan ku a pèrdè nan trabou, esnan ku ta sufri di defisiensia físikoi/o sigiko, nos grandinan i nos muchanan, i un partisipashon regulá di nos hóbennan ku tin ku bai karga nos futuro i un edukashon formashon pa krea siudadanonan responsabel i bon ekipá pa por asumí puesto i funshonnan klave den nos komunidat. Pa por logra esakinan, despues ku a desmantelá Antia Boneiru a skohe pa un laso direkto, kual e forma ku a yena esaki kategórikamente a keda rechasá via di un konsulta popular(referèndem) dia 18 di dezember 2015. Ku e rechaso aki implísitamente nos representantenan a haña un mandato kla pa atendé e kontenido di e laso direkto, ku pueblo ta eksperenshá komo defisiente, pero mas aun komo un praktika deskriminatorio pa motibunan ku no ta hustifiká ku un gran parti di nos komunidat segun rapòrtnan pa loke ta nivel di nos bida i nos infrastruktura ta hopi atrasá kompará ku loke ta akseptabel den Ulanda Oropeo.
Pueblo lo a spera ku e agènda di e bishita lo a enserá ku Konseho Insular, esta e 9 miembronan ku pueblo a skohe lo a forma un UNION di pensamentu i di akshon pa presentá na su representantenan na Ulanda, esta Tweede Kamer pero tambe na e gobièrnu Sentral na Den Haag un dokumento den kual ta mustra ku rèspèt i a base di igualdat e responsabilidatnan ku Ulanda ta karga den e desaroyo sosial-ekonómiko di nos isla pa atendé ku e arianan ku mi a menshoná. Sinembargo un biaha mas nos komo pueblo tin ku eksperenshá ku e 9 miembronan no por a laga na bandera di partido para un banda i uni tras di e bandera di Boneiru. Un biaha mas nos lo bai eksperenshá ku no tin ni agènda formulá, ni tin informashon kua puntonan ku ta primi ta bai duna prioridat den e bishita aki. No a ni ta brinda e komunidat un perspektiva positivo ku kosnan lo bai kambia riba término korto atrobe riba e arianan ku mi a menshoná.
Loke ta hasi e bishita aun mas débil en frente di Ulanda ta ku tin un kantidat di tarea ku nos a tuma na 10-10-10 ku nos na kas no a atendé ètòl i otronan ku a keda no akabá, Preba di esaki ta ku un biaha mas a sobra miones di dòlar ku no a keda uzá for di e presupuesto di 2020. Bo ta puntra bo mes ku ki kara ta bai pidi maas fondo, ku por sierto ta nesesario pa yega na e kalidat di bida komparbel i akseptabel den Ulanda, miéntras ku e fondonan ku nos tin no ta usa nan adekuadamente.
Mas den Ulanda, ban brasa Ulanda, yena pòtmòni, asfalt ta bai kore, ets. ta resultá di ta nada otro ku bakoba pa kue makaku, pasobra den su bida diario e pueblo no ta sinti ni ta eksperenshá ku e ta mas den Ulanda, ni ku Ulanda a akseptá nos brasé, ni ku te awe su pòtmòni no a yena, ni tampoko ku asfalt ta kore. Loke si e pueblo ta sinti tur dia ta ku tur bario a bai atras pa falta di infrastruktura modernisá, edifisionan di gobièrnu ta den un estado malísimo, ku no por brinda e servisio ku pueblo meresé, su fasildiatnan deportivo ta pésimo, bida a bira karu i preisnan di produkto i servisio ta subi den un forma inkontrolá, pobresa ta asotá mas ku 40% di nos poblashon, nos grandinan ta sklama pa un mihó penshun pa no mester sigui traha trabounan peligroso pa kubri nan gastunan, nos tin sufisiente kas pa pueblo, miéntras ku kasnan partikular ta inpagbel pa un gran parti di nos pueblo. Loke si e pueblo ta sinti i eksperenshá ta kareteranan ta den asina mal estado ku ta parse ku nos no ta den Reino Ulandes( e di 5 pais mas riku di mundu), pero mas bien nos ta biba riba un isla di terser mundo. I asina nos por sigui menshoná un kantidat di asuntunan mas ku bo ta puntra bo mes ku ta esaki ta e benefisionan ku nos a spera ora a konvensé e pueblo pa bai e laso direkto ku e kontenido aki.
Pa tur e rasonnan menshoná, mi no por yega na otro konklushon ku e biahe di e siman aki lo no kontestá e espektativanan ku polítikonan kier krea. Ora nan bin bèk man bashí, un biaha mas e pueblo lo sali desepshoná i desfroudá. Den tur e kaos aki, mi ta karga un speransa, esta ku sikiera un of dos di esnan ku ta den e delegashon, lo usa su tempu pa trese e dolónan, e nesesidatnan di e pueblo dilanti ku ta kai bou di responsabilidat di Ulanda, nan lo ta en todo kaso kumplimentu di palabrashonnan hasí na entre otro e akuerdo di gobernashon di aprel 2010, kualnan ta entre otro
– Un maneho kontrolá di imigrashon
– Un kubrimentu di e retraso riba tereno di infrastruktura den mas amplio sentido di palabra
– Nombramentu di un representante di Boneiru na Ulanda pa defendé interesnan di Boneiru i eleminá e pretenshon ku Ulanda sa mas ku tur hende kiko Boneiru mester.
– Un provishon sosial akseptabel den Ulanda sin usa kada biaha e preteksto di ku nos ta diferenshá for di Oropa. Klima, situashon ekonómiko, distansha i otro argumentunan fofo nunka por hustifiká ku nos nivel di bida ta asina atrasá kompará ku nos kosiudadanonan den Ulanda Oropeo. Manenshon di esaki ta simplemente un violashon di derechonan humano ankrá den diferente tratadonan ku Ulanda ta ko-firmante di nan.
Ami i pueblo lo keda ansioso i kurioso pa mira resultado di e bishita aki di nos delegashon na Ulanda den e próksimo siman. Lo e ta un muhé embarasá ku a pèrdè e yu òf e lo ta un yu nasé morto?

Share This
error: Content is protected !!