KRALENDIJK – Dia 10 di òktober 2010 Boneiru, Sint Eustatius i Saba kada un a bira un entidat públiko den Hulanda. E espektativanan na inisio di e kambio estatal tabata haltu. Durante e último añanan a logra basta kos. E nivel di kuido di salú i di enseñansa a mehorá konsiderablemente. Sinembargo, segun mi punto di bista, te ainda a tene muchu tiki kuenta ku nos kultura i sirkunstansianan lokal, pa kua tantu enseñansa komo kuido mester ta na nan servisio. Tin hopi kos ku ta laga di deseá. No ta tur e espektativanan ku hendenan tabatin dia 10 di òktober 2010 a keda realisá.

 

Ta nesesario pa siña di e añanan ku a pasa, no pa keda mustra dede riba loke no a bai bon, pero pa mira dilanti i hasi palabrashon tokante futuro. I tokante esaki mi diser­ta­shon ta bai.

 

Na momentu di e reforma sigur dos punto tabata di importansia dikon polítikamente mirá Boneiru a skohe pa un laso direkto ku Hulanda. Esakinan por sierto tabata eliminashon di e retrasonan enorme riba tereno infrastruktural i riba tereno di nivel di provishonnan, e área sosial. E konsepto núkleo den e diskushonnan di e tempu ei tabata ku semper e tópiko mester tabata prosperidat i bienestar di e siudadano Boneriano.

 

Miéntras ku desaroyo di un infrastruktura sólido (tantu físiko komo humano) mester a kontribuí na un nivel di prosperidat mas haltu, e sistema sosial lo mester a sòru pa esnan vulnerabel, spesialmente despues di a sali for di merkado laboral, lo por a hiba un bida digno di un ser humano. Na okashon di e deklarashon final, e ‘slotverklaring’ a enkargá Hulanda ku e obligashon di kuido aki.

 

Infrastruktura

Na momentu ku den kontinuashon di mi disertashon mi ta papia tokante rekuperashon riba tereno infrastruktural, e ora ei esaki ta inkluso infrastruktura humano. Ta trata di sufisiente kapasidat di ehekushon di parti di gobièrnu pa por ehekutá e tareanan ku a asigná na dje adekuadamente. Ámbos komponente, tantu e infrastruktura físiko komo esun humano, ta indispensabel pa un desaroyo ekonómiko duradero salú i sólido, ku na su turno lo sòru pa prosperidat pa kada siudadano, loke lo ta un faktor importante den e lucha kontra pobresa (un di e Metanan di Desaroyo Duradero pa 2030 di Nashonnan Uní, di kua Hulanda ta un ko-firmante).

 

Ta di lamentáku despues di un laso di 11 aña, ainda Boneiru su infrastruktura tin un retraso di tal índole, ku no por tin kestion di un sosten sólido di nos desaroyo ekonómiko. Kontrario na un munisipio normal na Hulanda, nos tin e tarea pa no solamente establesé un infrastruktura adekuá, pero pa alabes mantené esaki na un manera duradero. No por keda sin mustra riba e echo ku kaminda den kaso di munisipionan na Hulanda sierto infrastruktura ta keda kompartí konhuntamente, sea riba nivel nashonal òf sea riba nivel di koperashon munisipal, Boneiru ta pará su so den esaki. Un aeropuerto bon ekipá, un haf apropiá pa suministro di produkto i servisio, e aspirashon pa yega na fasilidatnan alternativo di energia i un hòspital di nivel haltu, djis pa menshoná un par, ta eksigí invershonnan kontinuo i duradero, i alabes den trahadónan di maneho kualifiká.

 

Un infrastruktura bon hinká den otro i bon mantené no ta un meta riba su mes, pero esaki kada biaha di nobo tin komo meta pa ta na servisio di e siudadano, pero tambe na servisio di e produkto Boneiru ku nos ta pone riba merkado komo sosten di un di nos pilánan ekonómiko mas importante, nos turismo.

 

Pero ta di importansia eminente tambe pa otro sektornan ku ainda mester desaroyá i ku tin ku sòrupa den futuro nos por hinka sufisiente kapital estranhero den nos ekonomia pa un balansa komersial i un balansa di pago salú. Esaki ta duna nos e posibilidat pa den futuro diversifiká e ekonomia frágil di e eskala chikitu di nos isla, pa por wanta sla i no pusta riba un kabai so. E pandemia a mustra kon frágil nos ekonomia ta.

 

Den e sentido aki por pleita pa un aserkamentu konhunto integral di tantu gobièrnu lokal komo e ministerionan enbolbí, manera e konklushonnan di rapòrt Spies ‘Sinku aña konektá’ tambe ta boga p’e. Konkretamente, pa realisá esaki mi ta boga pa un mandatario di reino apart (sekretario di estado òf ‘junior minister’) pa solamente  islanan BES, ku e ora ei ta haña e ròl di kordinadó entre e ministerionan na Den Haag i e gobièrnunan lokal na islanan BES. E retrasonan pa loke ta trata nos kareteranan, e edifisionan den kua gobièrnu lokal ta ubiká, nos aeropuerto, nos haf, fasilidatnan di IT i otronan ta supstansialmentemuchu grandi pa por garantisá un dunamentu di servisio bon i pagabel.E konekshon aéreo entre e islanan ABC ku ta sumamente karu tambe tin su efekto.

 

Segun mi opinion mester buska e solushon den kolaborashon struktural ku finansiamentu struktural. Den e sentido aki ta parse mi konsehabel i deseabel ku Hulanda i nos mes ta keda guiá paespíritu i letra di artíkulo 73 di e Karta Magno di Nashonnan Uní, kaminda segun mi ta duna sufisiente garantia pa gobièrnunan di teritorionan di kua e pueblo no a atkerí gobernashon propio kompleto ainda, i ku esaki Hulanda ta rekonosé e prinsipio ku interesnan di abitantenan di e teritorionan aki ta bini na promé lugá i ta aseptá esaki komo un tarea sagrado. E kontenido di forma aktual di koperashon ku a skohe ta laga di deseá i tin ora ta okashoná kontradikshonnan fuerte ku no ta stimulá un relashon gubernamental salú.

 

Man den man ku e realidat di Boneiru despues di un laso di 11 aña den e státus nobo ku mi a deskribí aki riba, ta bai e infrastruktura humano.

 

Manera e rekuperashon riba tereno di infrastruktura físiko ta na benefisio di e siudadano, di e hende, asina tambe gobièrnu, tantu di Reino komo lokal, mester karga, renobá i sigui edifiká esaki mas aleu.

 

Pa e motibu aki gobièrnu mester ta ekipá ku personal ku ta kualitativamente bon kapasitá riba nivel di maneho, pero tambe esaki mester ta e kaso riba nivel di ehekushon. Asigná sierto tareanan na gobièrnu lokal, ku no ta akompañá pa e finansa nesesario i personal ku ta kualitativamente bon kapasitá, no ta logra nan meta. For di e pòrtir na entrada di e servisio te na e direktor den su toren mester ta kombensí ku nan tin un solo tarea krusial pa kumpli kuné, esta: duna servisio na e siudadano.

 

Den e sentido aki mi ta boga pa un trayekto di rekapasitashon aselerá di e personal aktual (na un manera desisivo pa logra hañae persona korekto na e puesto korekto), pero tambe pa selektá i nombra preferiblemente profeshonalnan lokal, esunnan ku ta pafó di Boneiru tambe. Relashoná ku esaki ta di importansia pa adaptá e sistema di salario di gobièrnu lokal, mas tantu posibel basá riba merkado. Trabou tin ku paga, pero nivel di traha i pensa profeshonal apsolutamente mester duna fruta.

 

Mester tuma otro insentivonan tambe na konsiderashon, manera otorgamentu favorabel di hipotek i disponibilidat di tereno na èrfpagt pa personanan ku ta biba pafó di Boneiru.

 

Nivel di provishon

Artíkulo 110, insiso 3 di ERNA tabata bisa: ‘Un saldo negativo ta keda aprobá pa ordenansa nashonal, òf kambiá teniendo kuenta ku mester keda garantisá, ku e teritorio insular por laga su aparato gubernamental funshoná normalmente i ku e teritorio insular por sòru pa e provishonnan ku, mirando su nesesidat i e provishonnan na teritorio insular Kòrsou por konsiderá komo rasonabel. Si ta nesesario, pa medio di ordenansa nashonal por stipulá reglanan nobo al respekto’.

 

For di 10-10-1- no mag i no por tin kestion mas di un saldo negativo, mirando ku a base di lei a stipulá ku presupuesto mester ta ekilibrá. Sinembargo esaki no ta kita, manera a resultá, ku e Entidat Públiko no por laga su aparato gubernamental funshoná i sòru pa sierto provishonnan a base di e nesesidat ku e ta konsiderá rasonabel.

 

Por ehèmpel Entidat Públiko Boneiru no por move riba polítika di entrada i e tin solamente posibilidatnan limitá den kaso di kombatimentu di pobresa i dunamentu di ayudo sosial. Si den tempu di Antia Hulandes, Kòrsou tabata e punto di referensia, despues di 10-10-10 a pone riba papel ku e nivel di provishonnan mester ta garantisá di tal manera riba e punto di referensia ku esaki ta akseptabel na Hulanda.

 

Den e aspekto aki, manera ta resultá tambe for di rapòrt Spies, e motivashon di diferensiashon no ta un motibu di hustifikashon ku segun artíkulo 132a di konstitushon e lo por ta pa e realidat aktual kaminda e standart di bida di relativamente hopi habitante (segun Regioplan mas òf ménos 40%) ta keda hopi atras kompará ku loke na Hulanda Oropeo nan ta konsiderá aseptabel.

 

Sitashon for di e konklushonnan di rapòrt Spies:

Sinembargo, hopi biaha e islanan ta eksperensiá arbitrariedat ora ta trata di kon for di Hulanda Oropeo ta anda ku aplikashon di e prinsipio di igualdat. Den artíkulo 1, insiso 2, di Statüt a inkluí motibunan di hustifikashon pa diferensiashon entre Hulanda Oropeo i Hulanda Karibense. (For di 2017 a inkluí e artíkulo aki den artíkulo 132 a di konstitushon.) E motivashon pa e eskoho den legislashon na fabor òf netamente niun diferensiashon pa loke ta trata Hulanda Oropeo i entre e islanan, sigur den kuminsamentu tabata varia i hopi biaha tabata defisiente. Riba e punto aki for di gobièrnu di Reino no tin (tabatin) un aserkamentu uniforme òf direkshon apropiá. Aunke esaki den e trayekto pa yega na e transishon, teniendo kuenta tambe ku e preshon di tempu den e periodo ei, kisas tabata inevitabel, e akusashon di arbitrariedat ku hopi biaha ta tende na e islanan ta komprendibel. Spesialmente den área sosial nan ta eksperensiá e arbitrariedat aki. No ta fásil pa imaginá ku faktornan manera klima i sirkunstansianan geográfiko – sirkunstansianan ku segun Statüt lo por kondusí na sierto diferensianan – lo por ta un hustifikashon pa e realidat aktual kaminda e standarte di bida di relativamente hopi habitante ta keda leu atras kompará ku loke na Hulanda Oropeo nan ta konsiderá aseptabel’.

 

Ku e Akuerdo di Kralendijk (akuerdo dentro di Diálogo Sentral entre e partnernan sosial, inkluso Entidat Públiko Boneiru) a duna un empuhe serio, edifikando mas aleu riba e trayekto di TamaravanArk pa den kuater aña di tempu yega na oumentu di suèldu mínimo, for di kua por derivá e kompensashonnan sosial. Ta trata di un ehersisio ku de fakto ya for di 10-10-10 por a kuminsá kuné. Esaki ta e motibu ku, no opstante ku ta papia ku elogio tokante e inisiativa aki, pa hopi hende e no ta sufisiente pa alkansá e nivel ku ta aseptabel den Hulanda. Sigur nò ora no ta traha konkretamente i na un manera desisivo riba redukshon di kosto di bida i e ‘costofdoingbusiness’, e gastunan pa hasi negoshi.

 

Segun ami aki tin un oportunidat pa un maneho konkreto pa e periodo di e gabinete nobo na Den Haag i na Kralendijk.For di e karta di kontesta na e komishon fiho pa Asun­tu­nan den Reino ta resultá ku e ministerio di Asuntunan Sosial i e frakshonnan ku ta representá den e komishon ampliamente ta kompartí e punto di kuido aki, miéntras ku a laga un kantidat di e puntonan di kuido aki pa kuenta di responsabilidat di e gabinete entrante. Lo ta rekomendabel pa stipulá un punto di bista di maneho konkreto den e segundo mitar di aña 2021 den konsulta ku gobièrnu di Boneiru (eventualmente dentro di Diálogo Sentral), di manera ku entrante 1 di yanüari 2022 por kontinuá ku e trabounan pa yega na mehorashon di e situashon aktual. Un biaha mas, e Akuerdo di Kralendijk a ofresé un empuhe konkreto pa logra esaki.

 

Naturalmente tin mas punto problemátiko, manera e komishon Spies tambe ta indiká. En todo kaso ami kier a duna prioridat na loke e realidat aktual ta na Boneiru. A siudatnan aleman Aken i Keulen tampoko nan no a traha den un dia so. Pero nos tin ku kuminsá un kaminda sí. Mi a skohe pa e trayekto aki, ku segun mi opinion ta ofresé resultadonan tangibel, pa porfin krea un pida satisfakshon mas grandi serka nos poblashon, ku e direkshon ku a skohe enberdat ta pa un mihó prosperidat i bienestar pa nos hendenan.

 

E desafio pa nos tur awor akí ta e pregunta si esaki no ta e momentu korekto pa mediante un minikonferensia polítiko evaluá e manera ku a skohe pa yena e státus aktual, sigur pa loke ta trata e puntonan di kuido ku mi a referí na nan. 10-10-10 tabata un eskoho polítiko i pa e motibu aki mester tuma desishon tokante esaki riba nivel polítiko, promé ku riba nivel atministrativo por kuminsá transformá esaki pa e bira maneho duradero. Ku hopi atenshon mi ta spera riba kontesta di ‘Politiek Den Haag’.

 

Share This
error: Content is protected !!