Amy Damascus i D’Shantee Soliana ganadónan e di 7 Kompetensia di lesa Bòi Antoin 

Djasabra 19 di yüni último, a tuma lugá entrega di premio pa e di 7 kompetensia di lesa di  skolnan básiko ku Fundashon Lesa Ta Dushi (FLTD) i Fundashon Lesa I Skibi (FLIS) a  organisá pa muchanan di 9 pa 12 aña. E biaha aki FLIS a yuda nos ku e organisashon di e  kompetensia. Nos ta di opinion ku huntu nos por hasi mas pa muchanan ku tin difikultat den  lesamentu i pa nan sigui desaroyá den nos idioma Papiamentu. 

Durante seis aña konsekutivo a organisá e kompetensia bou di e nòmber ‘Kompetensia Plaka  Rotativo Bòi Antoin’ i ‘Kopa Junior’. For di e aña akí e kompetensia ta sigui ku e nòmber  ‘Kompetensia di lesa Bòi Antoin’. Direktiva di FLTD a tuma e desishon akí p’asina e skol ku  gana por keda ku su trofeo komo rekuerdo. 

E entrega di premio a tuma lugá na Liseo Boneriano. Pa motibu di reglanan di Covid, direktiva a opta pa hasi e kompetensia den un otro forma. Seis skol básiko, Kolegio San Bernardo,  Kolegio San Luis Betran, Skol Amplio Papa Cornes, Kolegio Strea Briante, Kolegio Kristu Bon  Wardador, Basisschool de Pelikaan, a hasi un grabashon di e partisipante lesando fo’i un buki i  teksto ku nos a manda pa tur skol. Nos a risibí diesun grabashon via imeil dia 4 di yüni último. Tabata tres hurado, Elsmarie Beukenboom, Mazarella Jansen i Monica Clarinda, ku a mira e  grabashonnan durante dos siman pa despues sinta huntu algun dia promé ku e evento pa  evaluá un bes mas. A yena puntuashon riba un formulario ku 8 punto ku e partisipante mester a  dominá. Kada skol a partisipá ku dos kandidato, un di 9 pa 10 aña i un di 11 pa 12 aña. Ku  eksepshon di Kolegio Strea Briante ku a partisipá ku un kandidato di 11 pa 12 aña. Maestro di  seremonia tabata Fernon Koeiman, miembro di FLTD. Eileen Croes-Piar a hiba palabranan  komo presidente di FLTD. Leonard Domacasse ku ta presidente di FLIS tabatin e tarea komo  presidente di hurado i a splika kon e konteo di puntonan a bai. Tambe el a hiba palabranan pa  enkurashá tantu e partisipantenan komo nan maestronan presente. 

E kompetensia di lesa importante organisá pa FLTD i FLIS ta pa motivá e grupo di muchanan  aki pa lesa. Tur partisipante tabata bon prepará dor di nan maestronan i mayornan. Huradonan  tabatin un tarea hopi difísil pa mira i skucha tur diesun grabashon. A usa pa edat 9-10 aña e  buki Bòchi Blòblò 2 di Merely Augusta i pa edat 11-12 aña a usa Nona bèk den tempu 2 di  Monica Clarinda. 

Tabata Basisschool de Pelikaan, representá pa Amy Damascus, ku a bai ku e promé premio,  den kategoria di 9 pa 10 aña. Kolegio San Bernardo, representá pa D’Shantee Soliana, ta bai  ku e promé premio den kategoria 11-12 aña. Nan a risibí nan trofeo for di man di representante  di diputado den Heyer, señora Jennifer Pocornie-Martis. Tambe nan a risibí un premio di  Edukativo Bonaire pa stimulá nan kreatividat i abilidat den nan tareanan di skol. Erickson 

Calcaño di Kolegio Strea Briante a bai ku ‘premio estímulo’. Su skol a hasi un grabashon bunita  huntu ku su klas. Tabata promé bes tambe ku Kolegio Strea Briante ta partisipá ku e  kompetensia di lesa. Erickson a risibí su premio estímulo entregá pa Katan ku a para ketu na e  parti di arte i drama p’asina e muchanan por dramatisá un tiki ora nan ta lesa un kuenta. El a  risibí un premio tambe serka Edukativo Bonaire pa sigui desaroyá su kreatividat i abilidat den  su tareanan di skol. Tur partisipante a risibí un serifikado i medaya serka Eileen i Leonard. Tambe e partisipantenan a risibí e dos bukinan ku a ser usá den e kompetensia, komo regalu  serka Elsmarie Beukenboom ku ta presidente di Akademia Papiamentu. Elsmarie tambe a hiba  palabranan pa enkurashá e partisipantenan i nan maestronan. 

Na final di entrega di premio, tabatin e oportunidat pa e personanan presente por a pasa un  ratu ameno ku otro. 

Direktiva di FLTD i FLIS ta gradisí tur spònsernan, kual ta Akademia Papiamentu, Katan i  Edukativo Bonaire. Tur skol a risibí pakete di buki di Biblionef i National Fonds Kinderhulp. Nos ta gradisí tur direktiva di skolnan básiko, maestronan i mayornan ku a duna nan gran  aporte p’asina e muchanan tabata bon prepará. Boso sosten tabata di gran balor pa boso  muchanan i nos fundashonnan. FLTD i FLIS lo sigui ku nan lucha pa konsientisá tantu nos  

muchanan komo mayornan ku lesamentu ta hopi importante pa desaroyo di nos muchanan di  Boneiru.  

Nos lema ta: “Un mucha ku ta lesa, ta bira un adulto ku ta pensa!”  

Na nòmber di direktiva di FLTD i FLIS 

Monica Clarinda 

Share This
error: Content is protected !!