Kralendijk – Bario di Nort’i Saliña tin su selebrashon di e fiestanan di San Juan i San Pedro, organisá pa Fundashon Nawati manera kustumber e aña akí atrobe. E selebrashonnan na Nort’i Saliña ta tuma lugá na e parke Red, Gold & Green dilanti di Mentor.

Selebrashon di e dos fiestanan kultural akí ta pa sigui konservá un tradishon di nos pueblo i pa pasa esakinan pa e generashon nobo, di manera ku ta sigui mantené e manifestashonnan kultural akí den nos bario i na Boneiru. Fundashon Nawati ta orguyoso ku e selebrashonnan akí tin bon akohida serka públiko i tokadónan di nos bario.

Pa e aña akí atrobe nos ta invitá e tokadónan ku kantantenan di bario i tambe e públiko ku gusta e selebrashon ku e bulamentu di kandela pa ta presente na e sitio for di 20:00 or pa e selebrashon riba 23 i 28 di yüni. Lo tin músika ku kanto, bulamentu di kandela i tambe e tradishonal betu pa tokadó. Nos ta hasi un yamada na e bario i na e amantenan di San Juan i San Pedro pa reservá e nochinan di djárason 23 i djaluna 28 di yüni, ku ta bispu di e dianan di e dos Santunan, pa e selebrashonnan. Nan ta un bunita aspekto di nos kultura ku nos mester mantené ku orguyo patriótiko.

Pa personanan ku ke buska mas informashon tokante San Juan i San Pedro por buska kontakto ku SKAL pa informashon tokante un dokumental di e Chispa di Juan ku Pedro ku ta pasa na televishon den e dianan akí.

Share This
error: Content is protected !!