Na promé instansia SVB-Kòrsou a duna di konosé por eskrito ku nan lo NO kumpli ku e veredikto di Korte di Hustisia di dia 1 di mart 2021. Pero despues di diferente buèlta nan a anunsiá dia 16 y 17 di yüni 2021 ku nan lo kumpli tòg. Tur penshonado na Boneiru, SXM, Saba y Statia lo haña nan sèn bèk ku forsa retro-aktivo te 2016/2017. Tantu e parti ku a ser kòrtá (10%) for di yanüari 2017 komo e kerstbonus anual for di 2016.
SVB a primintí por eskrito di lo manda un karta personal na tur esnan ku ta kai den e kategoria deskribí den e veredikto.
Wèl, mihó lat ku nunka. Nos ta apresiá ku SVB-Kòrsou a kambia di idea y a indiká ku nan lo kumpli after all. Nan a anunsiá tambe ku lo dura poko, pero nan lo manda e karta na tur esnan ku ta bin na remarke. Pues keda pendiente.
Sin embargo, nos mester keda alerta. Si kualkier penshonado ta kere ku e ta bin na remarke y no ta haña niun karta, tuma kontakto ku nos y nos lo chèk si en bèrdat bo ta bin na remarke y si ta asina, nos lo tuma kontakto ku SVB.
Bo ta bin na remarke
1) si bo tabata biba na Antia di 5 promé ku 2010,
2) si bo tabata biba na ex-Antia di 5 dia 29 di yüli 2016 y
3) si bo ta biba ketu bai sea na Boneiru, SXM, Saba òf Statia.
Pues, tin lus na final di e tùnel. Pa splika un k’e otro Asosashon VAC lo reuní na Sala Imelda tras di Misa di Coromoto na Antriol dia 25 di yüni pa 19.00’or. Tur penshonado ta bon biní.
REUNION DIA 25 DI YÜNI 2021 NA SALA IMELDA TRAS DI MISA COROMOTO
Share This
error: Content is protected !!