E  studiantenan den di dos aña di e estudio Lerarenopleiding Funderend Onderwijs (LOFO) di University of Curaçao na Bonaire a klousurá e aña akadémiko di forma festivo djamars último. Apesar di un aña pekuliar ku hopi medida i nodifikashonnan relashoná ku Covid-19 tabatin hopi desaroyo positivo.Un kantidat di seis studiante a risibí nan sertifikado propodéutiko.

 

RETO

Durante e aña akadémiko akí mas studiante a logra finalisá e fase propodéutiko (kaba nan promé aña di estudio ku éksito). Un tremendo prestashon, pasobra siguimentu di un estudio tabata un reto e aña akí. E medidanan relashoná ku Covid-19 tabatin hopi impakto riba e organisashon di enseñansa i pues tambe riba e studiantenan di LOFO na Boneiru. Maske e lèsnan a sigui, mester a pasa pa enseñansa di forma digital regularmente. Danki na e echo ku ta traha hopi kaba ku un ambiente di siñansa digital denter di e estudio, esaki por a tuma lugá sin problemanan grandi. Pero naturalmente esaki no ta deskartá ku e sistema akí a eksigí hopi mas esfuerso di e dosente i studiantenan; sigui lèsnan den un klas ta i lo keda balioso.

 

DESAROYONAN

Apesar di e kantidat di reto, e desaroyonan no ta para ketu. For di aña 2006 ta organisá i brinda e estudio di LOFO ku un sierto regularidat na Boneiru. Na aña 2016 a hasi un traspaso pa siñamentu di forma kombiná (“blended”),loke ta nifiká ku denter di e estudio ta hasi un kombinashon di lès den klas i tambe tareanan di forma digital. Dosentenan kapasitá i kompetente na Boneiru ta duna e lèsnan. E desaroyo mas resien tak u na yanüari 2021 a lansa e relashon laboral ‘Práktika den e skol’, bou di e nòmber Kibrahacha. Denter di e relashon akí e estudio ta traha di forma estrecho ku algun skol básiko aki na Boneiru, ku e meta pa yuda fasilitá e konekshon entre e estudio i e profeshon. Di e manera akí por sigui mehorá tantu e kalidat di e estudio komo di e skolnan. E relashon laboral a keda implementá simultáneamente riba tur e tres islanan ABC.

 

PROSPEKSHON

Den luna di ougùstùs e studiantenan akí tabai sigui ku nan di terser aña di estudio. UoC-Boneiru tin intenshon pa start ku un grupo nobo di LOFO i tambe pa kuminsá ku e estudionan pa Dosente di idioma (Papiamentu, Hulandes, Ingles i Spañó), e kurso di Sertifikashon Pedagógiko “PG” (kapasitashon komo dosente pa persona ku un título di formashon superior (hbo). Mas aleu ta brinda diferente kurso kòrtiku.Pa mas informashon òf pregunta, por tuma kontakto ku Rosemarijn de Jong, kordinadó di UoC-Boneiru, na tel. 717-3152 òf rosemarijn.dejong@uoc.cw.

Share This
error: Content is protected !!