Abitantenan di Bonaire despues di 10-10-10 a kere di a drenta un paraiso ku yen di kos bon for di Hulanda. Awor ku e realidat ta otro ke rabia i tira falta riba  e status di munisipio apart. Dos punto di agitashon ta, kareteranan deplorabel i pobresa. Kareteranan ta malu pero ta sigui kumpra outo luhoso, pues tin entrada i ta straño ku bo ke kore riba kamindanan malu i ke pa Hulanda drecha e kareteranan. Otro punto ta ku Hulanda no ke yuda resolvé e problema di pobresa. Pueblo di Bonaire komprondé ku e problemanan di  karetera i pobresa ta di nos i no di Hulanda. Ta nos mester resolvé nan.  Por resolvé e problema di pobresa fásil. E punto di salida ta fásil. Pobresa su definishon ta: Un hende ku no tin sèn. E solushon tambe ta fásil. Duna e persona sèn sin ningun kondishon. Kuantu hende ta den pobresa i kuantu sèn ta kosta pa yuda e hende pober. Mi sugerensia ta kuminsá eksperimentá na un manera bon hinká den otro sin kondishon. Duna un pober $12.000,-  pa e usa den un aña i wak kiko ta pasa. Laga nos stòp di pensa pa hende pober. Ku sèn e pober tambe por kuminsá duna kontenido na su bida. Respetá e pober su dignidat komo hende i no sigui kere ku mas sèn e ta bai hasi ko’i loko. Ami ta pensa i tin sigur ku e pober ta bai spar, kome mihó, buska un bibienda òf bai kas bèk, kuida su yu(nan), buska trabou òf invertí den un proyekto pa gana su bida òf sigui kurso pa elevá su mes. Nos mester kita for di e pensamentu ku hende pober ta floho, ta biba di ònderstant, ta kriminal, ku no por anda ku sèn.  Si di bèrdat nos ta kristian nos ta duna e hende un talento,sin ningun kondishon i despues wak ku el a usa e talento òf a der’é. Abo den bo zona konfortabel stòp di pensa negativo pa motibu ku e pober no ta ménos ku abo.

Share This
error: Content is protected !!