Willemstad – E gobièrnu nobo di Kòrsou ta pará dilanti di basta reto pa loke ta trata e presupuesto (multi-anual). Esaki e Kolegio di supervishon finansiero Kòrsou i Sint Maarten (Cft) a indiká den kòmbersashonnan ku entre otro e Minister di Finansa. Kòrsou mester traha i ehekuá un plan esaki den kua ta redusí e défisitnan den e presupuesto multi-anual. Banda di esaki mester implementá urgentemente vários kambio i ekonomisashon den kuido i seguridat sosial pa por garantisá ku e sistema sosial ta keda duradero i pagabel pa futuro generashonnan.
E presupuesto aprobá di e aña aki no ta kuadra mas i ta nesesario pa adapt’é. Cft a presentá vários rekomendashon pa logra esaki. E rekomendashonnan ta enserá entre otro introdukshon di reforma den e sistema fiskal, dirigí riba simplifikashon, kresementu ekonómiko i maneho di gastu, i un repartishon di entrada mas igual. Ademas a hasi rekomendashon pa mehorá strukturalmente e siklo presupuestario i di responsabilisashon, e maneho finansiero i e proseso pa determiná na un forma responsabel kon ta atendé ku akshonnan di entidatnan di gobièrnu.
Rekuperashon despues di corona
Kòrsou tin di haber ku un retraso ekonómiko di hopi aña i envehesimentu di e poblashon, i a haña gòlpi fuerte di e pandemia di corona. Na mes momentu e pais tin un potenshal enorme pa desaroyo ekonómiko. Prinsipalmente den e sektor di hospitality/turismo por logra hopi riba término kòrtiku. Na e momentu aki Kòrsou tin un bentaha riba destinashonnan ku e ta kompetí kuné. Ta di suma importansia den e añanan benidero pa pone e situashon finansiero di gobièrnu na òrdu i pa pone ekonomia di Kòrsou krese. Reforma ekonómiko, reforma fiskal i maneho di gastu lo ta krusial den e proseso aki.
A medida ku e ekonomia ta rekuperá sufisientemente, e nivel di dependensia di negoshinan di medidanan di sosten manera NOW i e kompensashon pa gastunan fiho (tegemoetkoming in de vaste lasten) mester keda redusí mas lihé posibel. Di e forma aki e défisit presupuestario pa 2021 tambe lo baha. E aparato gubernamental por bira mas efisiente ku un ehekushon apropiá di e proyekto di Retiru Boluntario Adelantá (Vervroegde Uittreding – VVU), ku ademas por brinda posibilidat di karera nobo pa e generashon hóben. Den e kuadro aki Kòrsou – kompará ku otro paisnan Karibense – por realisá un aselerashon si e ehekutá e medidanan i reformanan menshoná den e pakete nashonal (landspakket).
Ekonomisashon den kuido
Seguridat sosial i kuido ta forma un parti importante di finansa públiko. E fondonan sosial ta konfrontá défisit finansiero struktural, ku ta bai pisa mas i mas riba e presupuesto nahonal. Ta na e gobièrnu nobo pa tuma desishon tokante di e reformanan i pa ehekutá esakinan riba término kòrtiku. Sin e reformanan aki seguridat sosial i kuido aktual lo no ta sostenibel. Un ehèmpel ta e transishon di remedianan di marka pa remedinan genériko ku e mésun efektividat. Ku e transishon aki riba término korto lo por realisá un ekonomisashon di ANG 40 á 50 mion.
Pa e di tres kuartal Hulanda a komprometé su mes kondishonalmente pa ANG 168 mion pa sosten di likides. E sosten aki ta nesesario pa por apsorbá e último konsekuensianan di e krisis di korona. Pa evitá retraso innesesario i hustamente aselerá e rekuperamentu ekonómiko, Kòrsou pronto mester tuma un desishon tokante di e kondishonnan ku Hulanda a stipulá. Rekuperashon ekonómiko ta kuminsá awor i esaki lo mester kondusí na un redukshon lihé di e posishon di debe akumulá.
Cft a bishitá Kòrsou di 28 te ku 30 di yüni i a hiba kòmbersashon ku Gobernadó, Minister di Finansa, Konseho di Ministers, Banko Sentral di Kòrsou i Sint Maarten (CBCS), Stichting Overheidsaccountantsbureau (SOAB) i Konseho Sosial Ekonómiko (SER). Promé ku e bishita, presidente di Cft Raymond Gradus a tene un charla tokante di e situashon finansiero ekonómiko di Kòrsou promé i despues di e krisis di corona i supervishon finansiero. Por haña e charla aki riba website di Cft: www.cft.cw.

Share This
error: Content is protected !!