Siman pasá Tourism Corporation Bonaire (TCB) i entidat publiko tabata na Miami, Florida ku un agènda yen di diferente reunión nan relatá na e sektor krusero. Durante e biahe e tim tambe a plania un reunion na e ofisina prinisipal di Diamond Public Relations (DPR) pa reuní tokante nan esfuersonan i tambe futuro planes pa Boneiru.

Un delegashon konsistiendo di TCB; Marketing Coordinator Derchlien Vrolijk i Cruise & Project Coordinator Elesiër Angel huntu ku gobiernu di Boneiru; Diputado Hennyson Thielman, Harbormeester Günther Flanegin i Beleidsadviseur Debby Rauwers, a risibi un presentashon duná dor di Jody Diamond e president di Diamond PR tokante nan esfuerso i inisiativanan ku a keda hasi for di dia ku a kuminsa ku e trabounan pa Boneiru na novèmber 2020. Durante ultimo lunanan Boneiru a risibi un kobertura substansial na Merka manera den Caribbean Journal, Travel Pulse, Travel Weekly, The New York Times, Travel+Leisure, Forbes i muchu mas. Tambe danki na e esfuersonan di DPR, TCB a risibi diferente miembronan di prensa i ‘social media influencers’. Pa Merka te ku awor aki e kobertura total ta mas ku 102 mion i mas di 27 klep. Pa Oropa mas ku 20 mion ku mas di 27 klep. Boneiru a risibi kobertura den por ehèmpel DUIKEN, Focus, Connoisseur i tambe di ‘influencers’ manera Haroon Ali di National Geographic Travel Netherlands.

Maske ku buelonan direkto for di Merka no tabata posibel te ku resientemente, DPR a sigui ku esfuersonan i inisiativanan pa Boneiru keda den mente di posibel bishitantenan. Nan a organisa un seshon virtual pa Meet & Greet ku partnernan, krea e kampaña di media sosial ‘Love is in Bonaire’, tambe e kampaña ‘Bonaire Misses You’ ku mas di 50 partner ku a kolabora, a implementá rekisitonan di e plan di rekuperashon pa Boneiru, koordiná bishita di media, krea un plataforma online pa informa partnernan, produsi un foyeto di informashon pa prensa, sigura diferente transmishon di sorteo manera Good Morning America with Kelly and Ryan i diferente publikashon den prensa internashonal, pa menshona algun. E esfuersonan aki ta direktamente relashona ku e obhetivonan di e plan di rekuperashon pa turismo. Pa atrae e merkado eksistente di buseo, promove e diversidat di aktividatnan den aero liber, e diferente restaurantnan kulinario i e servisio luhoso ku Boneiru ta ofrese.

TCB i DPR tin diferente inisiativa plania pa merkado di Norte Amerika pa e proksimo lunanan. Manera un bishita di un grupo di prensa ‘summer media blitz’ konsistiendo di diferente prensa rekonosi mundialmente manera BRIDES, Cosmpolitan, Miami New Times i Fodor’s. Kobertura dor di Travel+Leisure, Wheel of Fortune, ON Magazine i un segmento riba CNN Travel. Un proyekto di fotografía ku un fotógrafo popular i profeshonal konosi pa su potret nan di submarino i ku afinidat pa naturalesa. Mas bishita di prensa manera Men’s Journal, Sophisiticated Living, The Atlanta Journal-Constitution, Access Hollywood i mucho mas. Pa e merkado Oropeo, nan ta trahando riba diferente inisiativa manera un produkshon i grabashon di un programa di televishon sumamente popular i konosi na Hulanda, ku ta tuma lugar den e luna di oktober proksimo. Tambe kobertura den e siguiente publikashon nan manera Magriet Magazine, National Geographic Travel Netherlands i un sorteo den revista LINDA ku kolaborashon di un partner lokal i mucho mas. Tambe ta trahando riba diferente kampaña i kobertura pa e merkado Canades, sperando e momento ku e frontera ta habri bek.

“Nos ta koutivá ku e kolaborashon ku Diamond PR, un tim ku ta profeshonal i inovativo ku ta dediká na mantene Boneiru den mente i ta krea ‘return on investment’ pa nos isla. Tantu pa e merkado Merikano i Oropeo,” segun Derchlien Vrolijk, Marketing Coordinator na TCB. “Nos ta ansioso pa e proksimo lunanan kaminda Boneiru lo sigui risibi mas kobertura substansial i resultadonan di kalidat.”

Share This
error: Content is protected !!