KRALENDIJK – Djadumingu 4 di yüli tin un grandioso Marshe #BONBAKUNÁ pa henter famiana Mangazina di Rei na Rincon. Durante e marshe lo tin presentashon di JC and Friends, DC Rappers, DJ Marvv, Farley’s Entertainment, Giovanni y Ethsel Entertainment I Grupo Eso. Ta bai tin stènt di diferente kuminda, stènt di artesania I tambe stent ku informashon tokante bakunashon kontra corona. E marshe ta tuma lugá di 10 or di mainta te 16 or di atardi.

Ta organisá e marshe pa para ketu I selebrá ku tin basta hende a bakuná na Boneiru. Nan kada un a kontribuí pa nos isla ta bon protehá kontra corona. Durante e marshe hende ku ke sa mas di bakunashon kontra corona por pasa na e stènt di informashon. Profeshonal nan di Departamento di Salubridat Públiko lo ta presente pa kontestá pregunta. Riba e dia mes tambe lo ta posibel pa traha sita pa bakuná na Kompleho Deportivo Jorge Nicolaas.

E marshe ta forma parti di un serie di aktividat ku Departamento di Komunikashon ta organisá. Resientemente a organisá un debate I enkuentro informativo pa alumnonan di MBO. I algun tempu pasá a produsí tambe un video i jingle tokante e tema di bakunashon kontra corona yama ‘Ban Bakuná’.Por skucha esaki riba entre otro Spotify I tambe Youtube.

Share This
error: Content is protected !!