Kolegio konsultativo Grupo di Diálogo Pasado di Sklabitut ta rekomendá pa Estado Hulandes pasa pa rekonosementu, diskulpa i rehabilitashon pa e pasado di sklabitut. Esei tin pará den e rapòrt ‘Kadenanan di Pasado’ ku presidente Dagmar Oudshoorn awe a entregá na e minister di Asuntunan Interno i Relashon den Reino, Kajsa Ollongren.

‘KU E RAPÒRT AKI, KOLEGIO KONSULTATIVO TA MARKA FIN DI E TEMPU SIN KOMPROMISO.’
Dagmar Oudshoorn, presidente

Kolegio konsultativo ta trese dilanti ku rekonosementu ta un paso importante pa Hulanda den su totalidat. Di un banda, rekonosementu ta duna satisfakshon na esnan ku a sufri bou di sklabitut, i di otro banda, e ta promové un bista krítiko riba historia hulandes den un sentido mas amplio.

Aki ta trata di rekonosé ku e komèrsio di katibu i sklabitut ku a tuma lugá entre siglo diesshete i promé di yüli 1863, direktamente òf indirektamente ku outorisashon hulandes, tabata krímennan kontra humanidat. Ademas tambe mester rekonosé e sufrimentu di tur hende ku a bira víktima di e krímennan aki i e sufrimentu di nan desendientenan.

Diskulpa ta yuda ku sanashon di sufrimentu históriko, pero diskulpa prinsipalmente ta dirigí riba konstrukshon di un futuro komun. No ta bai pa mustra dede riba personanan individual komo esnan kulpabel, pero pa Estado Hulandes rekonosé e sufrimentu adishonal kousá pa sklabitut, i tuma responsabilidat ku bista riba un relashon den futuro.

No por separá e rasismo institushonal di awe for di siglonan di sklabitut i kolonialismo i e ideanan ku a originá den e konteksto aki. Den bista di e kolegio konsultativo, restorashon ta nifiká ku mester atendé e konsekuensianan di un forma integral i sistémiko.

Den e rapòrt e kolegio konsultativo ta bini, entre otro, ku e siguiente rekomendashonnan:
• Lansamentu di un programa nashonal di investigashon di e pasado di sklabitut i su efektonan te ku dia di awe.
• Mas atenshon pa e pasado di sklabitut den enseñansa i instituto pedagógiko.
• Prevenshon aktivo di diskriminashon i rasismo institushonal den henter komunidat.
• Un fasilidat nashonal pa oumentá visibilidat di sklabitut.
• Promé di yüli komo dia nashonal di konmemorashon den presensia di rei i gobièrnu.
• Pasa pa rehabilitashon di Tula i otro héroe di resistensia.
• Lanta un fondo di Reino entrante promé di yüli 2023 pa finansiamentu struktural i duradero di medidanan di rekuperashon.

 

Tarea
Minister di Asuntunan Interno i Relashon den Reino a lanta e kolegio konsultativo dia promé di yüli 2020 pa organisá un diálogo nashonal tokante e pasado di sklabitut hulandes i e impakto di esaki riba komunidat di awendia. Un diálogo dirigí riba konekshon i riba un rekonosimentu mas amplio i inkorporashon di e pasado komun aki.

Background
Den su forma di trata su tarea, e kolegio konsultativo a uza un aserkamentu mas amplio posibel. Den esei tambe a enbolbí e islanan hulandes karibense. A papia ku representante di diferente grupo di interes, sektor sosial, hubentut i varios grupo den sosiesat. A lansa un kampaña públiko, a konsultá un panel di siudadano i a pidi ekspertonan sientífiko pa duna un aporte na e diferente aspektonan di e kuestion di pasado di sklabitut i impakto di esaki riba komunidat kontemporáneo.

E Kolegio konsultativo
E siguiente personanan ta miembro di e kolegio: Dagmar Oudshoorn (presidente), Edgar Davids; Lilian Gonçalves-Ho Kang You, Hannie Kool-Blokland, Glenn de Randamie, Ruben Severina.

Share This
error: Content is protected !!