Kralendijk – Entidat Públiko Boneiru den kolaborashon ku diferente partner ta bai kuminsá ku sierto trabounan na Playa Fòrn’i Kalki pa transformá e bich den unu mas aksesibel i mas bunita.

 

A traha riba un diseño pa e playa ku ta hasi esaki mas organisá i ku fasilidat pa esnan ku ta bishitá e playa. Lo bini sufisiente lugá pa stashoná outo ku espasio pa bùs tambe por para. Parti ariba ta bai krea un terasa ku palapa, konekshon grátis di internèt, un trapi mas mihó i seif pa baha na e playa i matanan bunita i lokal pa krea e esfera ideal. “Laman ta parti di nos kultura i identidat boneriano. Disfrutá di un dia na playa ku famia ta un aktividat ku nos komo boneriano ta hasi regularmente. Teniendo na kuenta e historia i tambe e kantidat di persona ku ta bishitá Playa Fòrn’i Kalki ta nesesario pa mehorá e fasilidatnan na e bich aki pa nos lokalnan i e industria turístiko”, segun diputado di turismo Hennyson Thielman

 

Lo bai traha tambe riba un parke di hunga pa nos muchanan, kioskonan kaminda empresarionan lokal por bende of hür ekipo, un área pa por kumpra kos di kome i bebe ku mesa di piknik i un edifisio ku fasilidat di baño kaminda por kambia paña. “Un arkitekto boneriano a traha diseño di e bich aki. Nos ta sumamente orguyoso ku un hóben profeshonal i lokal ku ta kompronde nos estilo i nesesidatnan a traha diseño di e bich pa asina nos sigui hisa nivel di bida di nos suidadanonan”, segun diputado di infrastruktura James Kroon.

 

Entidat Públiko Boneiru a perkurá pa mantené e aspektonan natural i úniko di e bich i ta garantisá ku esakinan lo keda intakto. E bich ta i lo keda grátis pa públiko, ta solamente un facelift e ta haña pa nos lokalnan i bishitantenan. Desaroyo di e bich aki ta den liña di maneho di nos sektor turístiko i e Plan di Rekuperashon di Turismo. Meta di esaki ta pa elevá nos fasilidatnan i krea eksperensianan nobo i úniko. Por spera ku den e lunanan binidero desaroyonan visibel ta tuma lugá na e bich. Esaki kisas lo limitá e akseso temporalmente, pero na mes momentu lo perkurá ku aki 6 luna Boneiru  por gosa di un Playa Fòrn’i Kalki hopi mas bunita ainda.

 

Share This
error: Content is protected !!