Siman pasá representantenan di Tourism Corporation Bonaire (TCB) i gobiernu di Boneiru a asistí na un kumbre di krusero na Miami ku Florida Caribbean Cruise Association (FCCA) a organisá. E delegashon di Boneiru a konsistí di Kordinadó di Merkadeo di TCB Derchlien Vrolijk, Kordinadó di Krusero di Proyekto di TCB Elesiër Angel, Diputado di Desaroyo Ekonómiko i Turismo Hennyson Thielman, Kapitan di Haf Gunther Flanegin i Konsehero di Maneho Debby Rauwers.

Esaki tabata e promé evento despues di e pandemia, kaminda representantenan di tur kompania krusero por a topa ku ehekutivonan di diferente destinashon i touroperator-nan. E kompanianan krusero a kompartí nan eksperensia ku e pandemia i nan plannan pa move padilanti i renobá e industria. E presentenan por a rekonektá ku otro, establesé relashonnan nobo i papia tokante desaroyonan ku ta andando i tópikonan relashoná ku reinisio di nabegashon krusero. Pa Boneiru esaki tabata un oportunidat pa restablesé konekshonnan eksistente i komuniká tokante e vishon nobo, den liña ku e Plan di Rekuperashon di Turismo.

E kompanianan krusero a presentá nan protokòlnan nobo, manera nabegá ku te 95% di wéspetnan bakuná, kaminda un mayoria di e 5% ku no ta bakuná ta mucha bou di 12 aña. E ehekutivonan krusero a mustra interes den eksperensianan lokal (kultural) den un intento pa ‘Go local’. Ademas e kompanianan krusero a informá kon nan ta redefiní nan inisiativanan ekológiko i sosial i konstruí barku nobo ku ta mas sostenibel.

E delegashon boneriano a asistí tambe na enkuentronan individual ku diferente kompania krusero i organisashon apart. Durante e enkuentronan akí Boneiru a presentá su vishon riba bishita di barkunan krusero den futuro, manera esaki ta formulá den e Plan pa Rekuperashon di Turismo. Esaki ta den liña ku e esfuersonan pa krea un sektor turístiko ekilibrá i sostenibel pa término largu pa Boneiru.

Ta spera e promé bishita krusero na Boneiru na kuminsamentu di luna di sèptèmber 2021. Ehekutivonan krusero ta indiká ku Boneiru ta un di e islanan mas popular, ku un servisio na wéspet i eksperensia ku un skor riba 9 riba un eskala di 1 pa 10, mas haltu ku e skor di 7 na aña 2016. Esaki ta un kòmplimènt direkto pa e operadónan lokal na Boneiru i pa tur hende ku ta direktamente i indirektamente konektá ku e industria di servisio krusero.

 

Share This
error: Content is protected !!