Sekretario di estado señor Knops ta na Bonaire i ta bai papia ku Gezaghèberi sekretario di teritorio insular.Ta kiko tin di papia si un par di siman pasá a papia na Hulanda? Ta bai bishitá Plenchi di Trabou, pero dikon no ta papia ku WimpySaragosa i RudselLeito. Ta bai dal un trep na Klein Bonaire pa wak desaroyo di SabalPalm ku ta mas importante ku desaroyo di nos hendenan . Ta bai bishitá haf i waf, pero nos sa kiko ta bai wak. Ta tempu pa no tene konferensia di prensa pero un reunion di maske un ora ku tur miembro di prensa i trata e konklushonnan di ombudsmanReiniervan Zutphen. Ta bon pa señor Knops sa ku e Akuerdo Atministrativo no ta funshoná pa motibu ku ke hasi hopi kos sin un struktura bon deliñá. Segun gezaghèber i mènedjer di programa tur kos ta sosodé tras di kortina. Loke ta nifiká balia riba tono di Hulanda. Meskos ku CFT ta supervisá finansa di Bonaire tin eksperto hulandes pa supervisá Akuerdo di Atministrashon. Maneho di Bonaire mester ta den man di Konseho Insular i Kolegio Ehekutivo. Bonaire no konosé un strukturá di efisiensia i efektividat. Esaki mester kuminsá ku e telefonista. Bo ta bèl i bo ta haña un stèm ta bisa bo e menú for di kua bo por skohe i na último un operadó ku ta bisa mi ta konektá bo i na final bisa, e persona ta na reunion, su telefon ta okupá òf e no ta sintá na su mesa i na final bisa purba un biaha mas. E kontestanan aki ta mustra kon bruá maneho di e isla ta. Un telefonista mester di mas outorisashon pa duna e kliente servisio. Un eksigensia ta pa gezaghèber, tur hefe, hefe suplente, sekretario di hefe i hefe suplente, sekretario di portofolio i lidernan di proyekto entregá tur mainta nan agènda na e telefonista ya e sa kiko e por bisa e kliente i kon e por yuda e kliente. E telefonista tambe mester di kurso i mi ta bai bèl i sigui bèl te ora, dia, siman òf luna mi haña un sita ku gezaghèber pa atendé e asuntu akí. Si no logra ta den konseho Insular lo mi trese e asuntu aki dilanti ya ku ABVO no ta hasi nada pa e telefonistanan.

Share This
error: Content is protected !!