PHILIPSBURG – Gobièrnu di Sint Maarten ta pará dilanti di retonan grandi pa loke ta trata e presupuesto multioanual. E presupuesto pa e aña koriente 2021 ta mustra un défisit di aproksimadamente 20 porshento si Produkto Interno Bruto i te ainda e no a keda aprobá pa Gobernador. Sint Maarten lo mester traha energétikamente i sistemátikamente pa redusí e défisit presupuestario i pa krea un surplus. Di e forma ei por kumpli ku e normanan di Lei di Reino pa supervishion finansiero (Rft) i lo por kuminsá paga e debenan hopi haltu di e pais. Pa hasi e kuidomédiko i seguridat sosial sostenibel, reformanan struktural dirigí riba limitashon di gastu ta inevitabel. Kolegio di supervishon finansiero (Cft) atrobe ta urgi pa pone na òrdu e maneho finansiero i pa aprobá presupuestonan i kuentanan anual na tempu. Ta solamente di e manera aki gobièrnu i parlamento por haña nan kòntròl bèk.

Na mitar di aña Sint Maarten ainda no a aprobá e presupuesto di 2021. Segun e Rft, esaki ya mester tabata e kaso 15 di desèmber di aña pasá. Cft ta konsiderá esaki un situashon preokupante; miéntras tantu tur atenshon ya lo mester ta dirigí riba e presupuesto di 2022. E presupuesto aki lo mester inkluí un plan kon pa transformá e défisitnan presupuestario den surplus.

Pa limitá e défisit mas tantu posibel, mester tuma medida pa subi entrada i redusí gastu. Un di e posibilidatnan pa logra esaki ta di hasi e prima di seguro médiko di empleadonan públiko igual na esun di empleadonan den sektor privá. Un di dos posibilidat ta pa oumentá konsiderablemente e límite di suèldo pa seguro médiko i seguro di aksidente. Un di tres posibilidat ta pa laga polítikonan tambe paga pa nan seguro médiko i penshon.

Mester mehorá supstansialmente kumplimentu ku obligashon di paga impuesto. Hasiendo esaki, por logra realisá un repartishon hustu di e peso fiskal entre siudadanonan i empresanan, terminashon di kompetensia inhustu i redukshon di e défisit den e presupuesto nashonal.

Den e Lei Final pa e presupuesto di aña 2020 entre otro a keda stipulá ku lo redusí e término pa e wachtgeld pa gobernantenan polítiko di 2 aña pa 1 aña. Cft ta apresiá esaki ta konsiderá esaki komo un promé paso den e bon direkshon.

E miembronan di Cft Kòrsou i Sint Maarten a bishitá Sint Maarten di dia 5 pa dia 7 di yüli, kaminda nan a hiba kòmbersashon ku Gobernador, Minister Presidente, Minister di Finansa, Minister di Salubridat Públiko i Asuntunan di Labor i Komishon Finansiero di Parlamento.

Sint Eustatius

Riba 5 di yüli Cft Bonaire, Sint Eustatius i Saba a bishitá Sint Eustatius i a reuní ku e Komisario di Gobièrnu, e Komisario di Gobièrnu suplente, Konseho Insular, Hefe di Maneho Operashonal i Hefe di Finansa. Cft a keda impreshoná pa e kantidat di proyektonan ku ta den ehekusho i otronan ku ta finalisá, i tambe e mehoranan den e maneho finansiero, kompará ku e último bishita ku e Kolegio a hasi na 2019.

Share This
error: Content is protected !!