KRALENDIJK – Bonerianonan bakuná por hasi entrante 8 di yüli 2021 petishon na 0800 0900 pa un prueba di bakunashon pa biaha pa paisnan den Oropa sin hasi tèst di corona. E prueba di bakunashon ta un kódigo QR riba papel. Abitantenan ku hasi petishon pa e kódigo QR riba papel, ta haña un sita pa pasa buska esaki. Na Boneiru siudadanonan ku a bakuná a haña un karchi di bakunashon. Ora di hasi petishon i pasa buska e kódigo QR, siudadanonan mester tin e karchi di bakunashon i nan pasaporte na man. Ta bini un solushon ainda pa persona ku no por pasa buska e kódigo komo ku nan no ta na Boneiru(mas). Na Hulanda siudadanonan mes por upload e prueba di bakunashon via un app. Siudadanonan di Boneiru no por hasi esaki pasobra Boneiru no ta konektá riba e sistema akí ainda. Ta trahando duru pa pronto siudadanonan mes por upload e prueba  di bakunashon na Boneiru. Pa awor siudadanonan por haña e prueba di bakunashon via Salubridat Públiko, esta den forma di e kódigo QR riba papel. Departamento di Salubridat Públiko ta hasi un yamada na siudadanonan pa awor akí hasi petishon pa e prueba di bakunashon solamente si nan ta bai biaha pronto. Esaki pa prevení muchu hende ta yama pareu i e liñanan ta bira inalkansabel.

Share This
error: Content is protected !!