Diaranson 7 di juli 2021, Secretario di Estado Raymond Knops tabata di bishita na Aruba pa e ultimo biaha como Secretario di Estado. A reuni cu Prome Minister Demisionario sra. Evelyn Wever – Croes y a trata diferente tema, entre otro palabracionnan cu Hulanda, Landspakket y Rijskwetten. Principal den e encuentro aki a refleha confiansa cu ta poco poco biniendo bek den Aruba. Algo cu Gabinete Wever – Croes 1 a bin ta traha hopi duro riba dje durante e ultimo añanan.

Prome Minister Demisionario sra. Evelyn Wever – Croes a expresa cu basa riba e forma di expresa di sr. Knops por constata cu e confiansa tey bek, cual ta crea perspectiva pa futuro. E reunion a bay den bon ambiente y si refleha riba e ultimo añanan di Gobernacion sigur tabatin hopi momento cu no tabata facil den relacion cu demas paisnan di Reino y Hulanda.

“Sigur tabatin momentonan bon y menos bon, sinembargo el a yuda pa Aruba sigui pusha pa yega na un areglo pa ricibi ayudo durante di e Pandemia.

Aworaki ta wak padilanti cu formacion di Gobierno nobo y un base asina ta duna hopi mas speransa y perspectiva pa futuro”, Premier Wever – Croes a expresa.

Secretario di Estado sr. Raymond Knops

Segun sr. Knops durante di e bishita cortico aki na Aruba a haya e oportunidad pa reuni y papia cu sra. Wever – Croes tambe riba resultadonan di eleccion pa cual a duna felicitacion y a trata e maneho hiba durante periodo di Gabinete Wever – Croes 1.

El a expresa cu tabatin bon cooperacion entre Gobierno Hulandes y Gobierno di Aruba y lo kier continua cu esaki pa atende cu e retonan cu tin.

Sr. Knops a enfatisa cu durante e ultimo añanan e tabatin bon relacion di trabou cu sra. Wever – Croes y otro miembronan di Gobierno. Kisas no tur momento tabata di acuerdo cu otro, pero si a mantene bon relacion cu otro y cual ta un di e lesnan cu ta importante pa e relacion entre Paisnan den Reino, basa riba confiansa na bienestar di tur ciudadano.

Finalmente sr. Knops a expresa cu e ta mira un futuro sumamente briyante pa Aruba.

Share This
error: Content is protected !!