Manera ya conoci, diabierna siman pasa Gobernador di Aruba señor Alfonso Boekhoudt a apunto Prome Minister Evelyn Wever-Croes como e formador di e siguiente gobierno. Esaki, Prome Minister a expresa, naturalmente ta un honor grandi di por ocupa e funccion importante aki. E trabou aki ta pa percura pa yega na formacion di un gobierno.

Prome Minister a indica cu e trabounan pa yega na un formacion di e Gabinete Wever-Croes 2 ta wordo parti den 4 diferente aspecto.

E prome aspect:

Partidonan MEP y RAIZ mester yega na un acuerdo di gobernacion den liñanan grandi. No un acuerdo den detaye pero si un acuerdo di gobernacion. Kico cada partido tin pensa di haci riba cada area importante di nos pais; economia, finansa, enseñansa, salubridad, social, siguridad, ta aspectonan cu ta importante pa nos pais. E trabounan aki ta andando y ta bayendo bon. Nos no ta cla ainda pero e ta bayendo den bon direccion.

Reparticion di e carteranan:

Despues nos mester yega na e reparticion di e carteranan di e minsiterionan entre MEP y RAIZ. Ainda no ta conoci cua ta e ministerionan cu ta toca na MEP y cua na RAIZ. Ta pidi tur hende carga un poco mas pasenshi mientras e proceso aki lo tuma luga. Manera cu esaki ta conoci, lo publica esaki. Mientras tanto, tur loke ta saliendo den medionan social ta speculacionnan.

Apunta Ministernan y screening:

Despues cu keda cla cu e reparticion di carteranan, lo apunta e personanan cu lo wordo proponi como candidato pa bira minister. Pa e Partido MEP e ta depende kico ta e carteranan cu MEP haña y ken Partido ta propone pa bira candidato pa minister y e ora e proposicion lo yega cerca Prome Minister y alabes Lider di MEP, como formador.  Despues lo tuma luga e screening di e candidatonan cu a wordo proponi. Esaki lo tuma su tempo.

Mi a yega di haci esaki caba den pasado algun biaha. E no ta un proceso cu bo por rush pasobra e ta un proceso cu mester tuma su tempo pa e ta bon y pa henter Aruba ta sigur cu e proceso di screening a cana su caminda”.

Stakeholders:

E di 4 aspecto ta cu durante full e periodo aki unda tur e stapnan ta wordo tuma tras di cortina, como formador Prome Minister lo papia cu diferente stakeholders den comunidad. Cu gremionan comercial, gremionan sindical, cu representantenan di area social, salubridad, area di naturalesa y desaroyo economico, pa scucha wak kico nan ta haña ta importante pa e gobierno nobo tene cuenta cu ne den e siguiente gobernacion pa e proximo 4 añanan. E reunionnan lo cuminsa pronto. Ya ta trahando riba e schedule pa por saca e invitacionnan pa e reunionnan aki. stakeholders lo wordo pidi pa pone tur nan aporte na e reunionnan riba papel tambe pa asina comparti cu e minsiternan nobo ora cu ta asina leu.

Esaki ta e proceso di formacion. E ta un proceso hopi serio, hopi importante y mester tuma su tempo. Pues mi ta canando e caminda manera cu mester ta, no mucho poco poco y tampoco apresura. Mi ta pidi tur hende pa keda trankil y bo por ta sigur cu e trabounan importante aki ta den man di hende serio y capas pa haci’e. Na e momeno aki no por anticipa ken ta bira minister di kico. Tin hopi speculacion riba esaki pero tur cos cu ta sali eifo aworaki ta speculacionnan. Ora cu ta asina leu, nos lo publica detayadamento e resultado di e proceso. Duna nos tempo y espacio y dentro di un paar di dia nos por presenta na Aruba e miho gobierno cu Aruba por tin den e temponan aki’, Prome Minister Evelyn Wever-Croes a duna di conoce.

Share This
error: Content is protected !!