Kralendijk – Entidat Públiko Boneiru a krea kupo di trabou huntu ku Plenchi di Trabou i diferente kompanianan di gobièrnu. E kuponan di trabou ta pa personanan ku a keda sin entrada pa motibu di e pandemia di Covid-19.

Entidat Públiko Boneiru tin 500.000 dòler for di entradanan reservá di 2019 pa diferente proyekto ku e meta pa mitigá e efektonan negativo finansiero di Covid-19 riba nos isla. Ku e diferente proyektonan ta stimulá nos ekonomia i krea kuponan di trabou manera mantenshon di sitionan públiko i edifisionan di gobièrnu, tim di rosa i kap mata, kuidadó di playa, evaluadó i mas. E proyekto “Krea Trabou” ta brinda e posibilidat pa por sigui kurso i formashon i ta fungi komo un introdukshon pa e trahadónan riba merkado laboral. “Krea Trabou” ta ofresé trabou pa minimal 3 luna te 6 luna. E trahadónan ta risibí un salario kompleto.

“E grupo afektá pa e pandemia di Covid-19 ta grandi. Tin mas òf ménos 415 persona ku ta sin entrada i no a keda nos nada otro pa bini ku solushonnan proaktivo riba término kòrtiku. E kolaborashon di e kompanianan di gobièrnu ta pone ku awor tin diferente kupo di trabou disponibel ku ta aliviá e situashon finansiero di nos siudadanonan”, segun diputado di desaroyo ekonómiko Hennyson Thielman.

Un di e proyektonan ku ya tin algun tempu andando ta e tim di rosa i kap mata i mantenshon di sitionan públiko. A sera un akuerdo ku Selibon pa ehekutá e tareanan akí. Selibon ta tuma trahadónan di Plenchi di Trabou pa por sigurá ku e kuponan ta bai pa e personanan ku a pèrdè nan trabou. Selibon su tarea ta pa kontrolá e trabou i sòru ku nan ta keda hasi esaki na nivel. Tambe Selibon ta komuniká ku EPB bèk na momento ku esaki keda finalisá.  Algun di e trabounan di mantenshon ta enserá fèrf i ‘touch up’ sitionan públiko i trabou di limpiesa i kap mata. E sitionan kaminda ta bai ehekutá e trabounan ta entre otro e diferente bichnan kaminda lo kap mata, drecha baki di mata i sòru pa e bich keda limpi i atraktivo. E trahadónan ta hasi mantenshon di parkenan públiko i limpia i drecha banki i fèrf esakinan. Tambe nan ta kap mata a lo largo di e rutanan di kana i drecha esakinan. Algun otro trabou ta enserá kap mata i limpia dam i roi i fèrf e rotòndenan, bòrchinan di bùs i diferente otro área den sentro di siudat.

Diputado Hennyson Thielman a bishitá e diferente sitionan kaminda por mira e trabounan ta tumando lugá. Por a nota sigur un tim aktivo i hasiendo mantenshon i limpiesa na nos bichnan.

Proyekto Krea Trabou ta un kolaborashon entre Plenchi di Trabou, BonLab, Selibon, Ofisina di Turismo i direktorado di Planifikashon i Desaroyo.

 

Share This
error: Content is protected !!