E Asosahón di Turismo Krusero di Bonaire (BCTA) ta preokupa pa e komunikashon i e politika ku gobierno ta
hiba ku e asina yama Tourism Recovery Plan y ku pronto lo ta na vigor. Despues di e ultimo komunikado di
prensa di BCTA referente na e karta di urgencia ku a keda manda pa Kolegio Ehekutivo i demás
departamentunan di gobierno e miembronan di BCTA pero tambe suidadanonan preokupa a indika ku nan no ta
na altura kiko gobierno en realidat ta pretende di hasi ku e turismo krusero aki na Boneiru.

E konsekuensha di e plan di turismo krusero no ta wordu deskribi den e ‘plan di rekuperashon’ (TRP).
Esnan ku a lesa e plan por a nota ku a pone hopi fondo y incentivo na disposishon di e sektor hotelero manera
(menos belasting, benefisio fiskal ora di hasi renobashon i permitnan pa hotelnan nobo ta keda kla mas lihe,
subsidio pa merkadeo enfin hopi kos). Esaki ta un diferensia grandi kompara ku e sektor krusero, es mas den e
plan ta para di lo korta signifikativamente den e turismo krusero aki na Boneiru. Ku otro palabra e ‘plan di
rekuperashon’ ta un plan di rekuperashon pa e sektor hotelero pero un plan di likidashon pa e sektor krusero.
Pa papia kla esaki ta asombra e mas di 100 empresarionan ku aktualmente ta asosia na BCTA. Dikon yuda e
sektor hotelero SI ku mayoría di donjonan ta estranhero of tin akshonista nan estranhero y NO yuda e sektor
krusero di ku al mayoría di e empresanan ku ta forma parti ta di hendenan lokal.

OLB ta likida e empresario lokal chikitu den un plan di rekuperashon?
E Tourism Recovery Plan (TRP) según BCTA tin hopi elemento bon den dje, pero solamente pa e sektor
hotelero. BCTA ta rekonose ku e sektor krusero na Boneiru tin algun punto logistiko pa mehora, pero den e plan
di rekuperashon e sektor krusero ta wordu likida enbes di wordu yuda.
E konsekuenshan di e likidashon di e sektor krusero aki no ta aparese den e ‘plan di rekuperashon’. Por ehempel
ta imposible pa sa kiko lo hasi ku tur e trabounan ku lo desaparese. Tampoko a duna atenshon na e miyones di
sen ku empresarionan di e sektor aki a inverti a base di e plan STMP 2017 – 2027 ku gobierno i e sektor aki a
adopta. E invershonan aki no por wordu rekupera si e ‘plan di rekuperashon’ (TRP) aki keda implementa.
Ademas no ta wordu menshona e perdida grandi di entrada ku lo afekta e sektor aki a base di e ‘plan di
rekuperashon’ of miho bisa e plan di likidashon pa e sektor krusero di Boneiru.

BCTA ke enfatisa ku no a kombersa, ni konsulta ku e sektor aki ora e plan a wordu traha!
Den e ‘plan di rekuperashon’ ta para ku 55% di e pasaheronan krusero ta interesa pa bolbe Boneiru komo turista
pa tempo mas largu (stay-over) Tambe ta para ku 60,6% di e pasaheronan krusero nunka mas lo reserva un
krusero después di e pandemia. Lo ke ta sigi ta medidanan ku a wordu diseña pa redusi aun mas e kantidat di
pasaheronan krusero. Ta un argumento fasil pa mira ku e plan aki ta kontradisi e palabra ‘rekuperashon’ i di
ningún manera nan ta den e mesun linja ku e STMP (Strategic Tourism Master Plan) E plan di ‘rekupershon’ of
miho bisa di likidashon di e sektor krusero na Boneiru tin e siguiente puntonan:
Komunikado di Prensa

• Máximo 1 barku di krusero pa día i no más di un par pa siman.
• Strategia di preis pa redusi e kantidat di krusero (aumenta e tax pa persona)
• Barkunan desea pa Bonaire tin un kapasidat maksimo di 1000 pasajero
• Nature Fee di Stinapa pa tur pasahero di krusero
Kiko ta e konsekuensia di e puntonan menshona i nan tin valides?
• 1 barku pa día ta signifika ku rutanan ya determina no por wordu realisa, ku e resultado ku Boneiru lo
perde mas barku ku e poko ‘dobel barkunan’ ku gobierno ke evita.
• Si nos wak 2019 i tur e barkunan di mas ku 1000 pasahero ku gobierno elimina esakinan ta sobra 20
barku pa aña, ningun di e empresanan aktual ku enfoke riba turista krusero por sobrebibi ku e tiki
kantidat di barkunan aki.
• E aumentonan sugeri riba impuesto pa persona (head tax) den e ‘plan di rekuperashón’ ta planta
pregunta riba e kortamentu di impuesto pa e sektor hotelero. Además, e aumento di e impuesto aki
(head tax) durante un krisis ta difísil splika sin un invershón demostrabel den mehorashon di e
fasilidatnan.
• Tin akuerdo nan hasi ku linjanan krusero ku 1/3 parti de e sen di e impuesto aktual pa persona (head
tax) ku OLB ta risibi ta destina pa Stinapa. Pa BCTA no ta konosi si esaki den pratika enberdat ta
wordu ehekuta. Pasaheronan di krusero ku ta bai hasi buseo ta paga un tarifa adishonal e asina yama
‘tarifa di naturalesa’ (nature fee) ademas di paga e tarifa pa persona (head tax). Na diferensia ku e
turista ku ta keda mas largu e turista krusero tin ku paga tur esaki mientras nan ta keda un averahe di 6
ora so riba nos isla lo ke a hiba tambe na e tarifanan redusi.
Pa resumi, e sektor di krusero na Boneiru lo no eksisti mas si e asina yama ‘plan di rekuperashon’ wordu
ehekuta. Por wordu hasta sugeri ku e sektor krusero aki deliberadamente ta wordu likida ku konsekuensia ku
hopi trabou lo wordu perdi den un ekonomia ku ya ta difícil kaba.

BCTA (Bonaire Cruise Tourism Association) ta indika ku tin tiki komprenshon ku e ‘plan di rekuperashon’ aki
mester wordu etiketa komo tal paso pa e sektor krusero esaki ta un likidashon total. Si OLB ta pretende di
likida e sektor krusero, e ora ey gobierno mester ta mas transparente ku esaki , mester ta konsiente di e
konsekuensianan i mester karga su responsabilidat pa ku esaki.

Share This
error: Content is protected !!