KRALENDIJK — Resientemente tabata tin e apertura i desfile di e kampionato di pony league ku ta speshal pa e mucha nan chikitu. Djasabra ultimo wega nan a kontinua i por a mira hopi akshon di e mucha nan den e wega nan ku a tuma luga. Mucha nan for di chikitu tin e talento i ta sigur prospektonan pa futuro. Por ehempel por a mira mucha nan di U8 hunga double-play. Ta algu sigur di aploudi i tambe por a tuma nota di un akohida di fanatiko basta grandi ku tabata presente djasabra atardi na stadion di Rincon. Aparte ku mayornan ta bin wak wega, tin diferente otro hende ta bini pa apoya e mucha nan. Resultado di  e wega nan ku a tuma luga djasabra ultimo ta lo siguiente: Rays kontra Reds a sali 12 pa 10 i Mets kontra Orioles a sali 3 pa 1. Nos tin di duna palabra di apoyo na e coach nan, dirigente nan di e ekipo nan pa karga e proyekto aki pa nos mucha nan. Sigur beisbol ta keda un deporte hopi keri pa hubentud, i esei por mira klaramente den e mucha nan reakshon durante wega. Ta hopi mucha tin ku ta praktika e deporte aki. Suplika ta bai pa e mayornan sigui stimula e mucha nan pa praktika deporte mirando ku teknologia ta hungando un rol grandi den e muchanan awendia.

 

 

FUENTE: LIVE 99 FM

Share This
error: Content is protected !!