Kralendijk – Awor sí renobashon di matadero ta bai kuminsá. Desvelo di un bòrchi dilanti di e edifisio na Kaminda Lagun tabata e señal simbóliko pa kuminsá ku esaki. Ku e renobashon Boneiru ta haña un matadero ku ta kumpli ku tur eksigensia moderno riba tereno di siguridat di alimento i salubridat públiko. Ta bini tambe mas atenshon pa bienestar di e animalnan ku nan ta trese matadero.

E matadero ta un parti importante di e departamento veterinario ku resientemente nan a establesé. For di firmamentu di e akuerdo intergubernamental na aña 2018, Entidat Públiko Boneiru i ministerio di Agrikultura, Naturalesa i Kalidat di Alimento a hasi palabrashon pa renobá e matadero. Pa medio di establesé un departamento veterinario Entidat Públiko Boneiru ta sòru pa duna habitantenan un mihó servisio. Esaki ta kana huntu ku e plan pa profeshonalisá krio di kabritu i agrikultura.

Entidat Públiko Boneiru a duna enkargo pa renobashon di e matadero. Entidat Públiko Boneiru i ministerio di Agrikultura, Naturalesa i Kalidat di Alimento huntu ta paga e renobashon. Streefkerk + Architects, ku alabes ta bai duna guia na e renobashon, a pinta e matadero nobo. Dimi Construction bv ta ehekutá renobashon di e matadero. E trabounan ta kuminsá den e di tres kuartal di e aña akí. Otro aña e matadero nobo mester ta kla.

Share This
error: Content is protected !!