Fundashon Alzheimer Bonaire ta kontinuá ku su afán pa ekstendé su “netwerk” pafó di Bonaire i Hulanda tambe. I den kuadro di inovashon den kuido di personanan ku demensia, resientemente Fundashon Alzheimer Bonaire a risibí di sra Will Doornik, Psychosociaal Therapeut, Coach, Trainer di Hulanda, un donashon di dos MEM-Beer.

Kiko ta un MEM-Beer.
MEM-Beer  MEM = moeder, Mama den Fries, idioma di Friesland.
Tur hende tin nesesidat pa risibí amor i kariño, kalor, seguridat i sostén serka otro persona. Esaki ta un nesesidat di bida ku ningun di nos no por biba sin dje.
E persona ku ta biba ku demensia tambe tin mester di amor, kariño i sostén. Ora e persona aki ya no por tin muchu kontakto mas ku su famia i sernan kerí, mayoria biaha esaki ta hasié tristu i intrankil i e ta sinti su mes insigur. Trahadónan den kuido ta hasi tur nan posibel pa duna nan esaki, pero no ta tur biaha nan ta logra pa yena e bashí i dolor ei.
Un inovashon den kuido di persona ku demensia ta e MEM-Beer. E MEM-Beer ta bini ku un grabador ku por graba 20 sekònde ariba. Un famia por graba un mensahe ku su stèm personal pa su ser kerí. Por kambia e mensahe aki tambe. Ora primi riba e beer e mensahe ku e stèm personal di su famia ta sali i e persona ta tend’é i tal bes rekonos’é tambe!
Kiko ta logra ku esaki? Wèl, ta logra ku e persona ta bai sintié kontentu, ku trankilidat i seguridat i esaki sigur lo yen’é ku alegria!
Direktiva di Fundashon Alzheimer Bonaire su intenshon ta pa logra buska mas di e MEM- Beernan aki, pa asina por yena mas tantu hende ku ta biba ku demensia nan kurason ku alegria. Direktiva ta masha agradesido na sra Doornik pa a introdusí e Beer aki na nos i tambe pa su donashon.

 

Share This
error: Content is protected !!