E kantidat di kontagio di Covid-19 último dianan na Boneiru ta oumentando. Pa e motibu ei mi a disidí di subi e nivel di riesgo. For di djabièrnè 23 di yüli binidero, Boneiru ta bai nivel di riesgo 2. Esaki kier men ku e situashon ta preokupante. Mester tuma pasonan nesesario pa protehá nos komunidat. E desishon aki tin konsekuensia pa nos manera di biba aki na Boneiru.

Dòkter Marian Luinstra-Passchier a anunsiá ayera kaba ku e variante delta a yega Boneiru. E variante aki ta hopi mas kontagioso ku esun ku nos a konosé aña pasá dia e pandemia di vírùs di corona a kuminsá. Spesial esnan ku no a bakuná òf ku no ta bakuná kompleto, ta kore riesgo di bira hopi malu. Ainda no tin hende den hospital i un gran parti di komunidat di Boneiru ta bakuná.  Pa esei no a disidí di bai un nivel di riesgo mas haltu. Tòg mi kier urgi esnan ku no a hasié ainda pa bai bakuná. (2 sekònde)

 

Un punto di atenshon i preokupashon ta, ku hopi hende ta bini bèk aworakí for di fakansi òf ta bini Boneiru komo turista. Apesar ku ta kouteloso i ta pidi pa hasi tèst promé ku drenta Boneiru, e variante aki tambe ta biaha ku e biahero i el a yega Boneiru. P’esei tambe desde djaluna último a pone Hulanda riba e lista di paisnan ku riesgo hopi haltu. Esaki ta nifiká ku banda di tèst di PCR negativo pa drenta Bonaire, biaheronan for di Hulanda mester hasi un tèst di PCR despues di sinku dia.

Por lo pronto no tin konsekuensia pa e bùbel entre Boneiru ku Aruba i Kòrsou. Personanan bakuná kompleto por bula entre e islanan aki sin restrikshon, pero tene kuenta ku esaki por kambia un ora pa otro.  Awor ta na kada unu di nos pa sòru pa e virùs no haña oportunidat pa sigui plama.

 

E manera pa sòru pa e vírùs no sigui plama ta pa atrobe, tene bo na e medidanan básiko ku ya pa mas ku un aña nos ta bin ta anunsiá. Laba man ku awa ku habon sino ku hand sanitizer, evitá di ta den aglomerashon, esta kaminda tin hopi hende. Evitá di mishi ku bo wowo, nanishi i boka i sigur tambe mantené e 1.5 meter distansia for di otro. Si no hasi esaki pronto nos tin mas kontagio i e ora ei nos tin ku eskalá e medidanan i bai un nivel di riesgo mas haltu. Pa aworakí, si nos tene nos mes na e instrukshonnan aki, e nivel di riesgo 2 ta sufisiente. Por haña un splikashon amplio di nivel di riesgo riba e wèpsait www.bonairecrisis.com.

Nivel di riesgo 2 ta enserá entre otro ku por lo pronto NO tin kantamentu i bailamentu ni den lugánan paden, ni pafó. E variante di delta ta move hopi fásil via di drùpel den aire di hende pa hende. Kantamentu i baila serka di otro lo sòru pa mas kaso di Covid. Ta p’esei diskotèk i klup nokturno mester sera. No por tene evento mas ku 50 persona i 50 porshento di kapasidat di lugá. Lo aktua kontra kada un ku no tene nan mes na e reglanan aki pa protehá komunidat di Boneiru.

Mas aleu mi ke menshoná ku sentronan pa hende grandi tin ku mantené nan mes na e medidanan básiko ku mi a menshoná ya kaba. Aki e limitashon di kantidat di hende no ta konta.

Por sigui práktika deporte paden. Si ta ku públiko, ta permití solamente mitar di e kapasidat paden manteniendo e distansia sosial di 1.5 meter. Pa praktiká deporte pafó no tin regla èkstra.

Establesimentu manera restorant i gym mester bolbe registrá bishitantenan.

Nos mester ta konsiente ku e vírùs di corona ku tur su variantenan ta un menasa pa nos komunidat i nos manera di biba. Anto aworakí ku e variante delta, mas ainda ta pidi pa nos ta mas kouteloso.

E vírùs no ta disparsé djis paso e sifranan ta abou, nos tin ku tene kuenta ku e lo tei pa semper. Pero nos mes tin ku protehá nos mes. Tene bo mes na e instrukshonnan i medidanan básiko konosí, pa evitá ku abo ta bira malu i tambe esunnan rònt di bo. Por último bai bakuna!

Share This
error: Content is protected !!