Refiriendo na mi kartanan ku preguntanan di 17 di yanüari i di 11 di aprel 2021 relashoná ku e situashon di e rotònde na Kaya Amsterdam/Kaminda Djabou i refiriendo na diferente reunion di komishon fiho di R&O relashoná ku e tópiko aki, ketu bai e tópiko di e rotònde ta sigui persiguí komunidat di Boneiru. Hopi promesa a keda hasí, hopi palabrashon a keda presentá, pero te ku awe no tin klaridat riba e rotònde. Ademas a primintí Konseho Insular ku lo bin un investigashon atministrativo pa determiná ta na unda e asuntunan a bai robes i te awe esaki tampoko a keda realisá. Tampoko nos a haña informashon di e resultado di e investigashon finansiero den e kaso di e rotònde aki. Awor komunidat ta tuma nota di moveshonnan rondó di e sitio ku tampoko ta trese klaridat kiko eksaktamente ta bai pasa.

 

Esaki klaramente ta un violashon di e prinsipio di transparensia; no mester di diskushon. Ta parse ku ken ku ta ta hasi kiko ku ta ku e resultado di kon ku ta. Na nòmber di komunidat mi ta eksigí ku gobièrnu ta komuniká den un forma transparente, korekto i kompleto kiko realmente a pasa i kiko ta bai pasa na e sitio men­sho­ná.

 

Pa tal rason mi ke hasi uso di nos Reglamentu di Òrdu, artíkulo 45,  pa hasi algun pregunta i ta urgi gobièrnu pa kontestá mi oral, al kaso, ku e urgensia nesesario pa eliminá tur konfushon i spekulashon, den e próksimo reu­nion públiko di Konseho Insular:

 

  1. Kiko a para ku e desishon anunsiá den konferensia di pren­sa di 16 di aprel tené pa diputado Kroon i e direktor di R&O ku lo bai eliminá e rotònde eksistente i lo traha un rotònde nobo ku entre otro material resiklá i ku lo bai kosta entre 6 shen pa 8 shen mil dòler?
  2. Kolegio Ehekutivo por a fasilitá Konseho Insular e desishon formal ei?
  3. Ken lo a bai pinta e rotònde nobo i for di kua fondo lo a finansiá esaki?
  4. Ken lo a keda enkargá ku supervishon di e ehekushon di e rotònde nobo?
  5. Kua kompania lo a bai ehekutá eliminashon i konstrukshon di un rotònde?

 

Direktor di R&O a anunsiá ku lo bai drecha e kaminda alternativo eksistente pa usuarionan te ora terminá e rotònde nobo i ku esaki lo a keda kla promé ku aña eskolar nobo ku lo habri 23 di ougùstùs 2021.

 

  1. Kolegio Ehekutivo por a fasilitá Konseho Insular e desishon pa esaki i e instrukshonnan ku a sali pa kua kompania reali­sá e drechamentu aki i kuantu esaki lo a kosta pa realisá?
  2. Dikon te awe no a remediá e situashon menshoná?

 

Por tuma nota ku tin moveshonnan nobo ta tumando lugá na e sitio en kuestion.

 

  1. Kolegio Ehekutivo por a informá Konseho Insular ta kiko ta pasando eksaktamente, esta ta ken a diseñá e situashon nobo, ken ta ehekutá esaki, kuantu e ta bai kosta i ken ta supervisá esaki?
  2. Mester komprondé ku e moveshonnan aki ta enserá ku a deshasí di e plan original pa eliminá e rotònde aktual i ku lo no traha un rotònde nobo? Si ta asina kiko ta bai pasa ku e rotònde aktual?
  3. Kiko ta e motibu ku a kambia di kompania ku tabata enkargá ku e parti di e proyekto aki konosí komo e proyek­to di infrastruktura di e tres skolnan.

 

Investigashon atministrativo:

 

  1. Kolegio Ehekutivo por informá Konseho Insular kua di e seis kompanianan ku a keda aserká, a keda skohé pa hasi e investigashon?
  2. Kolegio Ehekutivo por a manda e TOR ku R&O a traha pa deskribí e arianan di investigashon ku nan a deseá pa haña kontesta?
  3. Kuantu e investigashon aki lo kosta i ki tempu a instruí pa keda kla ku e investigashon i trese resultadonan konkreto?
  4. Kolegio Ehekutivo por a informá Konseho Insular kuantu fondo a sobra komo “minderwerk” debí ku a hasi e rotònde original aprobá muchu mas chikí i ki destinashon a duna na e fondonan aki?.
  5. Dado kaso ta nesesario, gezaghèber lo envolví e departamento“BureauIntegriteit” pa hasi e investigashon, ya ku ta responsabilidat di gezaghèber pa salbaguardiá prinsipionan di bon gobernashon den ehekushon di proyektonan sigur di e magnitut aki?

 

Komo representante di komunidat, mi ta spera ku Kolegio Ehekutivo lo sa den kuadro di komunikashon transparente di trese tur e kontestanan riba e preguntanan aki mas pronto posibel pa Konseho Insular i asina hasi esfuerso pa rekuperá e konfiansa ku mester tin den Kolegio Ehekutivo pa manehá fondonan i proyektonan na bienestar di e pueblo den un forma korekto i íntegro.

 

Share This
error: Content is protected !!