Kralendijk – E aerolíneanan merikano Delta i American Airlines ta bai oumentá  nan frekuensia di buelo pa Boneiru durante e temporada di wenter.

Despues di un periodo largu sin hopi aktividat turístiko, e dos aerolíneanan merikano, Delta i American Airlines riba 5 di yüni 2021 a reanudá nan operashon di buelo pa Boneiru. E dos aerolíneanan ta bulando dos biaha pa siman riba djárason i djasabra pa nos isla. Resientemente a anunsiá ku Delta ta bai oumentá nan buelonan pa Boneiru i for di 18 di desèmber 2021 pa 2 di yanüari 2022 Delta tin buelo diario pa Boneiru for di Atlanta, Georgia.

American Airlines tambe a partisipá nan oumento di buelo for di Miami, Florida pa Boneiru. Pa motibu di e demanda haltu ku tin American Airlines ta oumentá su buelonan  pa 3 biaha pa siman añadiendo un buelo èkstra riba djaluna. Aktualmente riba djasabra American Airlines ta usa e tipo di avion Airbus A319 pero den luna di òktober nan ta kambia esaki pa un Boeing 737. Esaki ta bai kontribuí ku 44 stul mas ku por bende. Finalmente American Ailrines lo oumentá su buelonan durante e periodo di fin di aña tambe pa buelonan diario kuminsando 16 di desèmber 2020 pa 3 di yanüari 2022.

“Oumento di e buelonan ta parti di e “Tourism Recovery Plan”. Nos a hasi hopi esfuerso pa por rekuperá e merkado merikano mirando ku esaki ta unu hopi importante pa e sektor turístiko di Boneiru. E merkado aki ta unu ku ta gasta mas ku averahe riba nos isla i nos ta mira potensial pa e merkado aki sigui desaroyá pa por sigui benifisiá for di dje”, segun diputado di turismo Hennyson Thielman.

Por pronostiká e periodo benidero komo unu drùk, kaminda komersiante nan den e sektor di turismo por bai spera moveshonnan ekonómiko positivo riba nos isla. Esaki ta resultado di e invershonnan ku a hasi den tim di merkadeo na Merka pa eksponé i posishoná nos isla mihó i tambe di e kolaborashon entre Tourism Corporation Bonaire, Bonaire International Airport i gobièrnu di Boneiru. E logro aki ta forma parti di “Tourism Recovery Plan” i ta konfirmá e rekuperashon rápido di e industria.

Share This
error: Content is protected !!