Fittipaldi Pietersz, kende fin di siman ku a pasa, tabata na Sint Maarten pa dragrace, a konta  su mal eksperensia, kaminda el a aksidentá ku su motosaikel. El a bisa ku e biahe pa Sint Maarten i e idea ku e organisashon ‘Caribean Motorsport Summer Fest, CAMOSUFE’, tabatin, tur kos tabata bon pensá. Loke si no a kana bon ta e parti di aktividat. Djis pa bisa algu kòrtiku di un storia hopi largu; ‘CAMOSUFE’ no tabatin pèrmit pa organisá e kareda ku mester a kuminsá djabièrnè 6 di yüli. A logra e pèrmit djasabra mèrdia i djadumingu anochi kareda a kuminsá i solamente algun buelta a tuma lugá. Solamente algun buelta; pasobra momentu ku ami a dal den e barikada, pon’é na e parti final di e kaminda, ku e organisashon a krea pa pusta, esta riba kaya, polis a opta pa stòp a aktividat. Personalmente mi tin ku bisa ku e sitio no tabata apropiá, no pasobra ami a kai, sinembargo hopi kos no tabata korekto! Otro kos, apesar ku ami i mas koredó a informá di e situashon, miembronan di e organisashon no a hasi kaso. Seguridat tabata laga hopi di deseá. A pone saku di santu kantu di e kaya, loke no tabata korektamente pon’é i e kaya tabata smal pa motosaikel i outo. (djis pa menshoná; mas smal ku kaminda di bai Sorobon). E parti di outo no por a kontinuá debí ku 2 outo no por a para banda di otro i pusta. 2 kachó tabata move bai bin riba e kaya pa pusta, hende tabata pasa riba e kaya i no duna oido na esnan ku ta dirigí kareda. E parti final kaminda ami a dal den dje, mi tin 24 aña ta drag, nunka mi a tende, mira niun kaminda ku nan ta organisá dragrace, ta pone barikada i saku di santu na e final pa stòp e vehíkulo ku ta den kompetensia. Mi ta lag’é te aki pasobra tin mas kos ku mi por bisa. E por ta zona fuerte, sinembargo mi no por bisa otro kos, si esei tabata loke a sosodé. Mi ta bisa loke a sosodé, pasobra hopi hende a puntrami; kiko a sosodé ku abo a kai, pasobra nos sa ku bo tin hopi eksperensia. Esei ta bèrdat i apesar ku mi tin hopi aña di eksperensia, mi por kai for di e motosaikel kualke momentu. Loke a sosodé na Sint Maarten no mester a pasa. Si tur kos tabata na un manera apropiá pa pusta, tur kos lo a kana bon i e chèns tabata hopi grandi ku mi lo a bai ku premio. Gran parti di koredónan aya tabata bisami nan no ke pusta ku mi, mirando kon bon mi tabata kore, ora di tèst.” Riba papel te na e momentu ku mi a aksidentá solamente ami i un motosaikel di Kòrsou a kore den 5 sekònde. Danki Dios mi a sali ileso for di e kaida, solamente mi dede chiki di pia i mi pink a hincha djis un tiki i e sigiente dia mi a lanta poko steif.      

 

Share This
error: Content is protected !!