OUTO A BAI AWA

Alrededor di 1.25 or dimardugá, sentral di polis a risibí notifikashon tokante un outo ku a bai awa na Pink Beach. E okupantenan, e shofùr i pasahero, a kana bai un hotèlsituá na Belnem despues di e aksidente kaminda nan a yama polis. Segun e shofùr el a bai desviá pa dos buriku i hasiendo esaki a pèrdè kòntròl dor di kua e outo a bòltu i a bai resultá den awa di e saliña.  Ambos tabata ileso, ku eksepshon di algun rasku, pero personal di ambulans a hasi un chekeomédikotòg na e sitio. Ambos tabatin nan faha di seguridat bisti.

 

KIEBRO DEN NEGOSHI NA KAYA INDUSTRIA

Riba djárason 21 di yüli sentral di polis a haña notifikashon di kiebro den un negoshi situá na Kaya Industria. Deskonosínan a forsa un porta pa por a drenta i bai ku entre otro un telefòn selular di kompania i tambe sènkèsh. Ta investigando e kaso.

 

KIEBRO DEN KAS

Riba djárason 21 di yüli a drenta keho di kiebro den un kas situá  na Bulevar Gobernador Nicolaas Debrot . Deskonosínan a bai ku entre otro un ‘Nintendo Switch’ kolo ros sin su kargadó, spèl di vidio Xbox ku dos ‘controller’, un iPad kolo plata/pretu i un ‘headset’ kolo ros di marka Razor. No ta konosí kon e malechornan a drenta e kas. E kaso ta bou di investigashon.

 

AINDA TA DUNA BASTA PROSÈSFERBAL DURANTE DI KÒNTRÒLNAN

Durante di kòntròlnan di tráfiko rutinario na diferente sitio den e dianan tras di lomba, a duna mas i mas shofùr but  pa kore:

  • sin reibeweis bálido
  • sin papelnan di seguro bálido
  • sin plachi di number
  • sin faha di seguridat bisti
  • sin hèlm bisti
  • pa stashoná robes
  • pa kore den direkshon prohibí.

 

Partikularmente pa manehá sin dokumentunan bálido  mayoria biaha a duna but.Durante di un di e kòntròlnan a konfiská un outo te ora ku e doño por mustra e dokumentunan bálido.

KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.

Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.

MÈLDU

Bo ta testigu di un situashon sospechoso? Bo ta mira komportamentu sospechoso òf un echo kastigabel ta tuma lugá? Mester di yudansa mesora? Mèldu esaki na polis. Polis ta evaluá kiko e posibilidatnan ta pa tuma akshon.

 

UNDA MI TA MÈLDU KIKO?

Por mèldu tantu via number di telefòn 717 8000, 715 8000 komo na bali di warda di polis. Naturalmente bo por mèldu serka e agente polisial riba kaya tambe.

Bo ta preferá keda anónimo? E ora ei por uza e number di telefòn 717 7251.

 

Yama 911 den situashon di urgensia òf ora gara un persona ta kometé un akto kastigabel. Yama 911 ora mester di ayudo den  situashonnan di bida òf morto. Ora señalá situashonnan sospechoso òf si bo ta testigu di un krímen. Òf por ehèmpel despues di un aksidente di tráfiko, kandela òf ora un hende ta kibra pa drenta. E ora ei kada sekònde ta konta.

 

KU KEN MI POR YAMA?

911 (emergensia/gara)

717 8000 òf 715 8000 (no ta emergensia, pero mester di atenshon di polis)

717 7251 (liña di tep anónimo)

Share This
error: Content is protected !!