Kralendijk –  E kantidat di tèst di PCR na Boneiru ta oumentá awor ku biaheronan for di pais di riesgo hopi haltu ta hasi tèst sinku dia despues di yegada. Ta trata di algun shen biahero pa dia, asina departamento di Salubridat Públiko ta duna di konosé. Biaheronan ta hasi tèst promé ku nan salida pa nos isla. Tin ora ta sosodé ku despues di yegada un biahero ta resultá di ta infektá tòg. Un biahero ku tèst positivo ta bai den isolashon, e ora ei e persona ei no por kontagiá otro hende.

E tèst riba e di sinku dia despues di yegada ta intenshoná pa redusí e chèns ku mas vírùs ta drenta i plama. Pa Boneiru awor akí por ehèmpel Hulanda i Colombia ta pais ku un riesgo hopi haltu. Nos isla ta distinguí kuater kategoria di riesgo pa pais: hopi abou, abou, hopi haltu i haltu. Ta adaptá e lista di pais i nan nivel di riesgo dependiente di e situashon di COVID-19 den e paisnan ei. Pa mas informashon tokante e lista ku pais di riesgo wak riba www.bonairecrisis.com

Share This
error: Content is protected !!