Pa di seis biaha empresarionan na Hulanda Karibense por risibí un kompensashon pa gastunan fiho for di Ministerio di Asuntunan Ekonómiko i Klima (Economische Zaken en Klimaat, EZK). E montante di e kompensashon por varia entre $500 i $400.000 i ta kalkulá a base di sifranan di volúmen di benta. Por entregá petishon for di 3 di ougùstùs 2021.

Pa por bini na remarke, e volúmen di benta mester a baha por lo ménos ku 30%. Riba e wèpsait di RCN tin un módulo di kalkulashon ku empresarionan por usa pa fásilmente kalkulá e montante ku nan lo por bini na remarke p’e. Den kaso ku e montante aki ta $6.000 òf mas, meskos ku tabata e kaso pa e areglonan previo, mester añadí un deklarashon di un tenedó di buki òf akountent independiente, pa konfirmá e sifranan kompletá.

Pa e di seis kompensashon aki, ta kompará e sifranan di volúmen di benta di e lunanan aprel, mei i yüni 2021 ku e sifranan di volúmen di benta di e mesun lunanan na 2019. Empresanan ku a kuminsá despues di promé di aprel 2019, por tuma kontakto ku unidat SZW di RCN pa haña un kálkulo personalisá di nan pèrdida di benta.

Tur kondishon i informashon adishonal ta disponibel riba www.rijksdienstcn.com/covid-19 (bou di pakete di emergensia di gobièrnu). Por entregá formularionan kompletamente yená i firmá, huntu ku e aneksonan nesesario, te ku mas tardá 31 di òktober 2021 via e adrès di meil tegemoetkomingEZK@rijksdienstcn.com.

Pa ayudo ku aplikashon por tuma kontakto ku Kámara di Komèrsio na Boneiru via di steunloket@kvkbonaire.com. Pa preguntanan urgente, por tuma kontakto via di telefòn ku unidat SZW di RCN via 781-5554 (Boneiru), 790-0052 (Sint Eustatius) i 416-3804 (Saba).

 

Share This
error: Content is protected !!