Kralendijk – Djasabra dia 31 di yüli 2021, e komishon ku a wordu lanta ku e meta pa
aktiva BSF bek, a organisa un reunion èkstra ordinario kual a wòrdu tene na e
sentro di bario di Tera Kòrá. Na e reunion aki tabata tin un total 17 persona di
kual 12 federashon ku a partisipá.
E reunion a kuminsá ku splikashon amplio di e eksistensia di BSF i for di
tempu ku e la wòrdu lanta te awor aki.
Despues tabata tin splikashon amplio di e nifikashon di BSF pa ku e
federashon nan deportivo na Boneiru.
Den esaki a bini bon kla dilanti ku te ainda BSF ta e federashon madre di
Boneiru ku ta wòrdu rekonosé dor di gobièrnu di Boneiru i ku tambe ta wòrdu
menshoná komo tal den e maneho eksistente di deporte.
BSF ta wòrdu rekonosé internashonalmente komo e federashon madre pa
atendé tur kos di deporte pa Boneiru.
Tambe a duna splikashon amplio di e sistema deportivo kon e ta hinka den
otro te pa e federashon nan por ta miembro di nan federashon internashonal
A splika tambe e motibu pa kiko e atletanan di Boneiru no por kompetí den
wega nan olímpiko, pero tampoko den wega nan Pan Amerikano, weganan
Sentro Amerikano i di Karibe of di Odesur,i kuantu esaki nan ta stroba e atleta
nan boneriano pa kompetí na nivel mas haltu id sigi desaroya.
Ademas a splika e importansia pa e deporte general mihó konosí komo
“Breedte sport”. Un otro punto ku a wòrdu splika ta e importansia pa tin un
direktiva nobo ku mester bai kana e proseso di statuto nobo, e maneho nobo,
akreditashon internashonal. Durante e reunion a puntra e miembro nan
presente si nan ta bai di akuerdo pa e komishon ku ta konsistí di Junny Vos,
Peter Silberie, Serapio Pop i Jose Luis Nicolaas por sigui ku e proseso pa
reaktiva BSF, tur miembro presente a bai di akuerdo i a proponé pa skohe un
miembro mas di manera ku e komishon por konsistí di 5 persona. Señor
Wijnand De Wolf di e federashon di natashon a pone su mes komo kandidato
pa yuda e komishon, demokrátikamente a puntra den e sala si tur miembro ta
di akuerdo ku postulashon di señor De Wolf, i tur miembro a bai di akuerdo pa
señor De Wolf forma parti di e komishon pa reaktiva BSF.
Tabata tin basta pregunta dor di e representantenan di e diferente federashon
nan, pero al final tur ta di akuerdo ku BSF mester bira aktivo p’asina sali na
vanguardia di deporte na Boneiru.
E komishon a haña un mandato di e federashon nan presente pa dentro di
dos siman presentá un proposishon di reaktivashon ku splikashon di e
benefisio nan pa asina por tin un mihó bista i komprendementu. Tambe a
palabra ku lo mail e statuto nan di BSF pa tur e federashon nan i tambe ku
kada federashon ku ta aspirá pa un puesto den e direktiva nobo di BSF pa na
por menshoná esaki den un mail na e komishon. E reunion tabata hopi
ameno i fruktífero. Señor Vos, na nòmber di e komishon a gradisí tur presente
i a aploudí kon uni i demokrátiko tur e federashon nan a partisipa na e
reunion.

Share This
error: Content is protected !!