Djarason 4 di òugùstus, Tourism Corporation Bonaire (TCB) a rekonosé e delegashon di Arte di Palabra Boneiru ku a partisipá siman pasá na Aruba den e kompetensia di Arte di Palabra ABC 2021, komo embahadornan di Boneiru.

E seremonia a tuma lugá na TCB ku un kaluroso bon bini dor di e tim di ofisina di turismo. Sra. Helen Thodé a habri e seremonia ku felisitashon na tur e partisipantenan ku nan prestashon den e kompetensia i pa tur e premionan ku nan a logra. Miss Tourism Bonaire Sunniva Manuel tambe a hiba algun palabra, di kon orguyoso Boneiru ta di nan i a hasi entrega di e medaya i sertifikadonan, mientras ku Angelo Domacasse a entregá e regalitonan.

Boneiru a duna un tremendo presentashon durante e kompetensia, logrando diferente premionan i a risibi e siguiente rekonosemento for di TCB:
-Akeesha Cicilia a risibi e medaya di bròns pa su partisipashon i su tremendo presentashon na Arte di Palabra ABC 2021.
-Juriella Josephia a risibi medaya di plata, komo el a logra segundo finalista den kategoria C poesia original i tambe den kategoria F kuenta original.
-Lygaria Pieters a risibi medaya di plata, komo el a logra terser finalista den kategoria A poesia eksistente.
-Maria Luisa Troncon a risibi medaya di plata, komo el a logra segundo finalista den e kategoria B poesia original.
-Radinka Alberto a risibi medaya di plata, komo el a logra terser finalista den kategoria E kuenta original.
-Irlenska Martinus a risibi medaya di oro, komo el a logra e titulo maksimo di ganador den kategoria C poesia original.
-Jeaniro Dorothea a risibi medaya di oro komo el a logra e titulo maksimo di ganador den e kategoria D kuenta eksistente i tambe prome finalista den e kategoria B poesia original.
-Ramso Coffy a risibi medaya di oro komo el a logra e titulo maksimo di ganador den kategoria A poesia eksistente i tambe ganador den kategoria B poesia original.

Jonathan de Windt a risibi medaya di oro pa su bon trabòu komo coach di tur e partisipantenan.

TCB ta apoya i enkurasha tur partisipante i tambe e komishon pa sigui desaroya e talento ku kada un tin i ta sumamente orguyoso di nan logronan durante e kompetensia di Arte di Palabra ABC 2021 na Aruba.

Un danki spesial na SKAL, na mayornan i e personanan ku a duna nan aporte pa sostene nos hobennan i e komishon organisado.

Share This
error: Content is protected !!