Direktiva di AFBW ta splika e situashon aktualmente rondó di e intrankilidat laboral na SELIBON.
For di aprel AFBW a haña bishita di trahadónan mal kontentu ku ABVO i ku nan kier afiliá na AFBW. AFBW na su turno a aktua korekto i a partisipá esaki na ABVO i den un reunion di USIBO.
E sindikato ku ta representá e miembronan a hasi su moveshon nan i ta tin pas bek. Den luna di yüli kosnan a bolbe kana malu atrobe i intrankilidat laboral ta bolbe presentá i trahadónan ta mal kontentu ku nan sindikato i nan ta bolbe akudí serka AFBW, ku na su turno ta bisa nan pa atendé ku nan sindikato i si nan kier afiliá nan mester kana e kaminda nan korekto, mester entrega retiro i mester ta mayoria etc enz.
Pero lamentablemente kosnan no a drecha, entre e miembronan i nan sindikato, trahadónan no kier a tende nada mas di nan sindikato aktual i a bolbe bini serka AFBW i e biaha aki desidido.

E situashon:

E situashon aki ta un situashon no sano pa e empresa i sigur no pa e klase trahadó, hopi pregunta, insidumbre, strès i prekupashon, bo ta tende ta un grupito ta mal kontentu, ta dikon no ta laga e trahadónan afiliá na e sindikato ku nan ke? Dikon tantu preshon riba e trahadónan etc etc.
Nos tur por a sigui esaki den prensa i media nan sosial.

AFBW komo un sindikato ku ta para pa e klase trahadó, a mira ku ta di bèrdat tin inkietut serka e trahadónan. Komo un sindikato responsabel, bo no por laga e trahadó nan aki desampará. Si AFBW no tuma nan, nan lo bai otro sindikato tòch, pasombra e mandato di nan tabata kla ku nan no ke ta ku ABVO mas.

Retiro masal di miembronan di ABVO pa AFBW.

E miembronan tin ku entrega nan karta di retiro na ABVO i na gerensia di SELIBON i despues e proseso di AFBW por kuminsá.

AFBW tin 43 formulario di inskripshon, AFBW por a komprondé ku tin 34 karta di retiro a wòrdu entrega na ABVO. Den e formularionan di inskripshon tin trahadó ku no tabata afiliá na ABVO, ku si ke bira miembro di AFBW.

AFBW ta kana e kaminda di lei den e kaso di e trahadó nan aki ku ke pa AFBW representá nan derecho laboral na SELIBON.

Aseptashon:

Un karta lo bai na e tim di maneho di SELIBON, ku e partisipashon, ku AFBW tin e kantidat di miembronan.
Den  e kaso aki e tim di maneho, lo por aseptá esaki sin mas, òf e por pidi un referèndem, pero nenga e no por nenga esaki.
Ta hasi un aplikashon serka mediador ku lo analisá tur e parti atministrativo i wak e parti nan legal etc etc.
E proseso lo start pa bini un referèndem kaminda ku e trahadó lo haña e posibilidat legal, demokrátiko pa skohe ken e ke pa represent’é.
Den un referèndem, mas sindikato tambe por partisipá, no ta e dos nan aki so por partisipá.
AFBW ke un klaridat den asuntu aki i pa sera e kapitulo aki.

AFBW komo un sindikato transparente i e parti di demokrasia ta haltu den nan organisashon ta kere ku si un trahadó ta haña ku e no ta bon sirbi kaminda e ta i ke un kambio e tin tur derechi di skohe, sea ku e ta keda ku esun ku e tin aktual òf ku e ta bai serka un nobo, esei ta su eskoho i esaki mester wòrdu respetá.

Lei di referèndem:

E pueblo i trahadó  tin ku komprondé ku e asuntu aki no tin nada di “ta dunadó di trabou ta skohe kua sindikato ta representá e trahadó”, e asuntu aki ta di e trahadó  i su sindikato, ta e ta disidí ken e ke pa represent’é. Ta e ta paga su sindikato fin di luna pa e wòrdu representá i haña e servisio ku e ta paga pe. Aki na isla nan BES ainda nos tin un lei di referèndem ku mester respetá, pero e lei aki masha dia no ta eksistí na Hulanda mas.

Na Hulanda ta e mayoria ta konta i ta e trahadónan ta yega ku nan formulario di inskripshon serka e dunadó di trabou ku e sindikato ku nan ke pa representá nan i ta esei ta nan sindikato.

No por ta asina ku dunadó di trabou ta mete den asuntu di representashon di e trahadó. E  trahadó nan den nan mayoria ta disidí esaki. E lei aki a wòrdu traspasá, for di e leinan di eks Antia, meskos ku e  lei laboral BES. Hopi di e lei nan aki mester wòrdu adaptá, ta lei nan hopi bieu, sigur pa e tempu ku nos ta bibando aktualmente.

Share This
error: Content is protected !!