KRALENDIJK – Lider di frakshon di MPB Elvis Tjin Asjoe ta haña ku Boneiru tin hopi potensial turístiko. E produkto turístiko ta hopi mas amplio ku mayoria di hende ta kere. E ta bisa esaki despues di a hasi un kaminata djadumingu huntu ku Grupo Chantiwawa den e region di Saliña di Tam. Den e grupo tabata presente tambe dos dama klave den e área di protekshon di naturalesa marino, den persona di Kalli de Meyer i Sabine Engel.

Chantiwawa tabata ke pa e partisipantenan mira ki tesoro Boneiru tin skondí den su naturalesa riba tera, loke bon presentá na turista ta un produkto interesante i atraktivo.

Tjin Asjoe, kende tabata te ku fin di aña tabata diputado enkargá ku turismo, a keda impreshoná pa loke el a mira i tende durante e kaminata aki. “Tabata algu úniko. Mi no tabata konsiente ku nos isla tin lugá bunita asina. Na mi opinion, na promé lugá nos mes hendenan, ku konosé e isla aki mihó ku kualké otro hende, mester probechá di e oportunidat pa organisá asina yamá ‘hiking-tours’ den e áreanan ku Chantiwawa ta eksplorá tur djadumingu.”

Di akuerdo ku e konsehal, Boneiru ta mundialmente konosí pa su bida bou di laman. Míles di sambuyadó ta bishitá e isla tur aña pa disfrutá dje tesoro aki bou di laman. “Pero Boneiru tin muchu mas ku esei, manera mi mes a mira durante e kaminata ku Chantiwawa. Inkreiblemente bunita. Esei mi por sigurá despues di djadumingu.”

Tjin Asjoe ke stimulá nos mes hendenan pa probechá dje oportunidatnan úniko aki. Di su parti e ke duna tur aporte pa inisiativanan pa stimulá partisipashon di e boneriano den tipo di aktividatnan asina. Boneiru mester amplia i diversifiká su produkto turístiko.

 

Share This
error: Content is protected !!