Kralendijk 19 di ougùstùs di 2021: E proporshon di koriente generá di manera duradero na Boneiru a baha di 33% na aproksimadamente 25% den e último aña nan. Esaki ta un resultado
direkto di e oumento di e demanda di energia debí na e kresementu kontinuo di e poblashon, turismo i aktividat nan komersial riba nos
isla. E kontribushon kada bes ménos di energia duradero no ta den mes un liña ku e konsepto di “Blue Destination” ku lo mester kombertí Boneiru den e
promé sosiedat sirkular na mundu, pero tambe ta den konflikto ku e polítika di kabinèt Rutte ku a komprometé su mes ku e akuerdo di klima di Paris.
“Komo Water-en Energiebedrijf Bonaire (WEB) , naturalmente nos ke kontribuí na e ambishonnan tantu di gobièrnu lokal komo di gobièrnu di
reino pa ta mas duradero. E informe di IPCC ku a keda resientemente publiká riba e kambionan di klima ta pone énfasis riba e nesesidat di esaki
un biaha mas. Sin intervenshon, e nivel di laman lo sigui subi i e generashonnan futuro na Boneiru lo mester teme ku nan lo muha nan
pianan” segun e direktor general Alfredo Koolman. “Lo no dependé di nos : despues di un proseso largu di evaluashon ku diferente partidonan interesá, nos a presentá un plan na Ministerio di
Ekonomia i Klima (EZK) na 2020, ku e sosten di konseho insular, pa subi ahainda mas e produkshon di energia duradero na 80% dor di oumento di
e kantidat di mulinanan di bientu i konstruí un parke solar. E plan a ser adoptá pa tur hende na Den Haag, pero desafortunadamente i apesar di
konsultanan ofishal intenso, ainda e desishonnan no a keda tumá”. WEB ta buska e finansiamentu mas favorabel posibel pa realisá e lokual a
ser proponé. Ta trata di un supsidio di aproksimadamente $32 mion. Tweede kamer / kámara di representante a pidi gobièrnu na vários okashon
atraves di varios moshon pa tuma medidanan pa subi e produkshon di energia duradero na Caribe Hulandes, pa hasi esaki “klimatneutral” i pa
pone e rekursonan nesesario disponibel pa logra esaki. Direktor finansiero , Joanne Balentien-Nicastia: “Nos plan ta kubri esaki i redusí nos
dependensia di kombustibel fosil, ku tabatin e impakto mas grandi riba e tarifanan den e último aña nan. Ku e sosten solisitá, e plan aki lo tin un
efekto positivo riba e tarifanan i no opstante , nos tin mas di un aña wardando un mensahe positivo di ministerio. Apesar di COVID-19, e pueblo
di Boneiru ta sigui krese i por mira ku turismo tambe ta krese atrobe. Nos ta yegando na momentunan nobo di invershon pa por kumpli ku e
demanda. Si no tuma e desishon den e próksimo lunanan. E porsentahe di energia produsí di un manera duradero ta menasá di baha kada bes mas i
nos lo sigui dependé di petrolio karu i kontaminando den e próksimo dékada”E implementashon di e plan di WEB, ku a ser kalkulá dor di ekspertonan
independiente, ta nifiká ku e 80% di energia produsí lo bini di energia di bientu i solo. Esaki lo kombertí Boneiru den un di e lidernan na Mundu. E plan lo por ser realisá den dos pa tres aña.

Share This
error: Content is protected !!