A detené dos ‘joyrider’

Riba djabièrnè 20 di ougùstùs alrededor di 3 or di mardugá un patruya na warda a topa un pikòp ku diripiente a hasi un kenshi straño riba kaminda. E patruya a haña esaki sospechoso i a siguié riba un distansia seif pa por a par’e pa kontrolá e . Esaki a surgi den un persekushon kòrtiku durante kua shofùr di e vehíkulo sospechoso tabata mustra komportashon di manehá imprudente. E pikòp a bin para na momentu ku e shofùr a pèrdè kontrol den un bògt i  a kore drenta mondi kantu di kaminda. A detené e  shofùr, un mucha hòmber di 14 aña di inisial H.C.M.C. i e pasahero, tambe un mucha hòmber di 14 aña di inisial T.M.A.K. Akonfiská e pikòp pa mas investigashon.

Alrededor di 8 or di mainta riba djabièrnè 20 di ougùstùs a drenta keho di ladronisia di un pikòp kolo shinishi skur di marka Nissan, modèl Frontier, numerá V-2816, for di un akomodashon turístikosituá na Bulevar J.A. Abraham. Ta trata di e mesun pikòp aki ku a konfiská algu mas trempan. E kaso ta bou di investigashon.

 

KIEBRO DEN AKOMODASHON TURÍSTIKO

Den oranan trempan di mainta riba djabièrnè 20 di ougùstùs a drenta keho di kiebro den un akomodashon turístikosituá na Bulevar E.E.G.  Deskonosínan a subi bai ariba via e parti patras di e edifisio pa por a drenta e apartamentu. E malechornan a bai ku entre otro dos Apple Iwatches, dos waya di Apple, un Apple iPad, un HP kòmpiuter,un tas di kòmpiuter, dòpi pa orea i sènkèsh. Ta investigando e kaso.

 

KANDELA

Den oranan di anochi riba djaweps  19 di ougùstùs,sentral di polis a haña notifikashon ku tin un kandela den besindario di Kaya Patachi. A resultá ku tabatin un ida tereno na kandela kaminda tabatin un kas den tambe. Brantwer a paga e kandela. Habitante di e kas no tabatei. No tabatin herido.

 

AKSIDENTE ENTRE DOS OUTO

Alrededor di 9.40 or di anochi riba djaweps 19 di ougùstùs un aksidente entre dos outo a tuma lugá riba e krusada di Kaya Papa Cornes i Hanchi Amboina. Outo 1 tabata koriendo riba Kaya Papa Cornes bayendo den direkshon di Kaya Korona na momentu ku outo 2 a sali for di Hanchi Amboina i dal den e banda robes di outo 1. Personal di ambulans a atendé ku shofùr di outo 1 na e sitio mes i e no mester a bai hospital. Outo 1 tabatin daño material na e porta patras na banda robes  i glas di e bentana aki a kibra.

 

DETENSHON PA LADRONISIA

Riba djárason 18 di ougùstùs a detené un hòmber di inisial C.F.M. di 60 aña di edat na Kaya Ancela en konekshon ku ladronisia.

 

KIEBRO TA BIRA KONOSÍ DESPUES DI NOTIFIKASHON TOKANTE OUTO MAL STASHONÁ

Riba djárason 18 diougùstùs a drenta keho di kiebro den un akomodashon turístikosituá na Bulevar Julio A. Abraham. Deskonosínan a bai ku entre e yabinan di un outo di hür i bai ke outo pa un ‘trip’. E habitantenan a bin haña sa ku a kibra drenta na kas despues ku polis a bin na nan porta pa informánan ku nan outo tabata mal stashoná. E outo tabata stashoná mei mei di kaminda riba Bulevar Julio A. Abraham. Banda di esaki e malechornan a bai ku entre otro un macbook kolo di plata, un macbook kolo shinishi, tres set di ‘airpods’, un ‘headphone’ kolo pretu di marka Apple, un KLM iPad kolo di plata di marka Apple, dos tas di marka Clo’s, un tas di marka Seseun, dos brel di marka Polette i un brel di marka Marianne. Ta investigando e kaso.

Share This
error: Content is protected !!