Oranje Fonds ta inisiá awe ku búskeda di proyektonan spesial ku tin oportunidat  pa bini na remarke pa un Appeltje van Oranje 2022. E aña aki e tema ta Oportunidat igual pa tur hóben. Desigualdat den oportunidat ta un problema urgente den nos komunidat ku pa motibu di e krísis di Corona a bira mas grandi. Ku e Appeltjes Oranje Fonds ke pone atenshon riba proyektonan ku ta atendé e problema aki ku éksito, pasombra nan ta meresé sosten i rekonosementu. Pa bini na remarke pa un Appeltje organisashonnan por registrá te ku 30 di sèptèmber via oranjefonds.nl/appeltjes.Tres inisiativa lo risibí e premionan na mei 2022 serka Rei Willem-Alexander.

 Lamentablemente no ta tur hóben ta haña e mesun oportunidat. Diferente investigashon a demostrá ku desigualdat entre diferente grupo di hóben ta sigui oumentá. Dor di e krísis di Corona e problemanan a oumentá i ta mas bisto. Hóbennan tin èkstra preshon pa motibu di pèrdida di enseñansa, lugá pa kore stazje, trabou (permanente), entrada, struktura i kontakto sosial. Nan ta eksperensiá mas strès na kas, ta ser afektá pa por ehèmpel violensia doméstiko ku ta oumentá, ta sinti nan mes isolá i ta pèrdè perspektiva. Tambe tin gruponan nobo di hóbennan vulnerabel ku ta lanta.

Muraya invisibel

Segun un rapòrt di Sociaal Cultureel Planbureau di 2019 tokante oportunidat i opstákulonan bou di hóbennan tin menasa ku ta lanta un ‘muraya invisibel’ entre hóbennan ku tin òf no tin rekurso. Algun por probechá di e oportunidatnan i otronan ta topa nan ku opstákulo. Asina tin hóbennan ku sufisiente kapital ekonómiko i sosial ku tin mas posibilidat pa kapitalisá oportunidatnan ku ta aparesé. Aki kapital sosial ta bira kada bes mas importante: personanan ku  tin e nètwèrk korekto ta bai dilanti den bida. Aspektonan manera edukashon i orígen – unda bo nase, ken ta bo mayornan, di unda nan a bini i kiko nan ta hasi – ta hunga un ròl den esaki meskos ku prehuisio (inkonsiente), eksklushon i deskriminashon.

Afortunadamente tin hopi organisashon ku ta dediká nan mes na duna tur hóben e mesun oportunidat. I Oranje Fonds ta buska proyektonan spesial ku ta embolbí hóbennan ku ta sigui yuda otro hóbennan di e mesun edat p’asina duna nan e rekonosementu ku nan meresé. Pensa aki riba por ehèmpel un proyekto di amigu ku ta konektá hóbennan ku otro, un inisiativa ku ta laga refugiadonan di e mesun edat topa otro òf un proyekto di boluntarionan hóben ku ta ofresé sosten na hóbennan LHBTIQ+-. Sugerí un organisashon òf registrá un organisashon dirèkt pa bini na remarke por for di awor via oranjefonds.nl/appeltjes.

 Ta entregá e Appeltjes van Oranje tur aña na tres inisiativa ku di forma eksitoso ta konektá diferente grupo òf ta sòru pa otronan bolbe partisipá den komunidat. Tur ganadó di un Appeltje van Oranje ta risibí un eskultura di bròns trahá pa Prensès Beatrix i un suma di 25.000 euro. Tur aña Reina Máxima ta entregá e premionan. Den e añanan ku ta selebrá un lustro esaki lo ta na enkargo di Rei Willem-Alexander. E aña aki ta di 20 biaha ku ta entregá Appeltjes van Oranje.

Oranje Fonds

Oranje Fonds no ke pa ningun persona ta nan so i ke pa nan partisipá den nos komunidat. P’esei nos ta fortifiká i ta konektá organisashon, boluntario i donatùrnan ku ta kontribuí na un komunidat konektá. Nos ta hasi esaki danki na e.o. Nationale Postcode Loterij, Nederlandse Loterij, de Vrienden i diferente otro partner. Rei Willem-Alexander i Reina Máxima  ta e pareha patrosinadó di Oranje Fonds.

Share This
error: Content is protected !!