Zr.Ms. Holland entretantu ta ful swing ku e yudansa di emergensia na Haiti. E barku di patruya a sali dia 20 di ougùstùs pa bai urgentemente e isla, ku a keda asotá pa un teremoto. Nèt promé ku esei, Marina den algun dia a sabi di kita mas ku 2.160 kilo di kokaina for di riba merkado.  Esaki a sosedé durante un relashon di kolaborashon guiá pa Merka ku ta enfoká riba e lucha internashonal kontra droga. E kaptura di e  kontrabanda awe numa a keda publiká.

Un di e intersepshonnan tabata posibel despues di un tep di Wardakosta Region Karibe.  Esaki a deskubrí un ‘go-fast’ sospechoso. E helikòpter marítimo di kombate NH90, stashoná a bordo di Zr.Ms. Holland, a nabegá bai riba dje.  Un frankotiradó di Infantería di Marina konsekuentemente a dispará riba 3 motor  di e boto i a derumbá esakinan. Esei tabata nesesario despues ku siñalnan pa stòp i e disparonan no tabatin e efekto deseá.

Una bes ku a logra stòp e ‘go-fast’, un ekipo kombiná di Wardakosta Merikano i Kuerpo di Marina a subi bordo di e ‘go-fast’. E ekipo a saka e bultunan di droga ku a ser tirá den laman for di awa.  Tabata trata di mas ku 1.000 kilo di kokaina.

Mas droga

Despues di esaki Zr.Ms. Holland tabata envolví den un kaptura di mas o ménos 800 kilo di kokaina. E droga aki tambe tabata a bordo di un ‘go-fast’. Despues di un tep, Holland a nabegá bai riba nan.  E destakamentu Legal di Estádos Unídos a logra éksito den e intersepshon aki i a konfiská e kokaina.

Algun dia despues atrobe bingo! Un biaha mas e barku di Marina a involukrá e helikòpter di bordo pa obligá un ‘go-fast’ pa e stòp.  Esei a logra despues di señalnan pa stòp i tirunan di atvertensha.  Un biaha mas a tira 360 kilo di kokaina den laman, ku despues a ser saká for di den laman. E sospechosonan despues a keda entregá den man di Wardakosta Merikano.

Tur e sospechosonan i e droga finalmente a keda entregá na Wardakosta Merikano pa persekushon  na Estádos Unídos.  E 3 kapturanan a keda hasí den lapso di 1 siman. Tabatin un di 4  kaptura di 1.325 kilo di droga, pero esei a keda menshoná anteriormente kaba.  E frekuensha di e kuater kapturanan di droga den un siman mester keda kalifiká komo algu UNIKO.

 

Share This
error: Content is protected !!