KRALENDIJK  – Durante e prome mitar di òugùstus riba invitashon di Tourism Corporation Bonaire (TCB) un grupo di 7 miembro di prensa di diferente medionan di komunikashon di Merka manera South Florida Luxury Guide, New York Post, Upscale Magazine, Atlanta Homes & Lifestyles i TripSavvy a bishitá Boneiru. Un meskla di periodistanan nashonal i regional di merkadonan klave a bishitá Boneiru pa kubri un variedat di topikonan di biahe manera aventura i eksperensia eksklusivo. Durante nan bishita na nos isla e grupo a keda na Harbour Village Beach Club i a eksperensiá diferente aktividat manera ‘wing foiling’, windsurf, ‘land sailing’ i un paseo rònt nos isla. Adishonalmente un di e miembronan di prensa ta un sambuyado sertifiká i el a sambuyá ku Divi Flamingo Beach Resort i AB Dive.

Den yüli i kuminsamentu di ougùstùs, TCB a risibí 3 periodista ‘freelance’ di Brides.com, Fodors.com, Cosmopolitan Magazine i Miami Times huntu ku un fotógrafo. E periodistanan kada un a bishitá Boneiru ku diferente tarea pa skirbi tokante nan eksperensia na Boneiru pa un kantidat di publikashon inkluyendo e medionan previamente menshoná. E fotógrafo tabatin komo tarea pa kapturá un variedat di diferente imahen manera akomodashonnan luhoso te ku aktividatnan rònt di Boneiru. TCB lo uza e imahennan aki pa promoshoná Boneiru den futuro.

Tambe riba invitashon di TCB e produktor di e programa di televishon ‘Kilimangiaro’ di Italia, huntu ku su tim a bishitá Boneiru durante nan rekorido di e islanan ‘ABC’ pa grabashon di e episodio pa e show. Por mira e episodio entre òktober 2021 i aprel 2022 riba e kanal RAI. Mas ku 1 mion televidente  ta mira e show ‘Kilimangiaro’ tur luna riba djadumingu.

Durante di nan estadía na Boneiru, nan a keda na Resort Bonaire, a sambuyá ku Dive Friends Bonaire i a eksperensiá otro aktividatnan.

Di e diferente bishitanan di prensa durante ougùstùs, TCB ta kalkulá un alkanse di mas di 10 mion ‘unique viewers’, i mas ku 250.000 sirkulashon. “Ta sinti bon kon nos ta ekshibí nos isla ku e kolaborashon di e prensa- i medionan di komunikashon ku ta yuda komparti nos isla ku mundu kompletu. Tambe nos ta hopi agradesido na e apoyo ku nos ta risibi di nos partnernan lokal ku ta hasi e tipo di bishitanan aki posibel. E trabou kolektivo i kolaborashon ta puntonan klave,” segun CEO di TCB, Miles Mercera.

TCB ta yama danki na tur e partnernan ku a kolaborá ku e diferente bishitanan i lo komparti e resultado di nan bishitá den futuro serkano.

Share This
error: Content is protected !!